USAID სამართლის უზენაესობის პროგრამის მხარდაჭერით საქართველოს სამოქალაქო და ადმინისტრაციული სამართლის სპეციალიზაციის მოსამართლეებისგან შემდგარი ბავშვთა უფლებების პრაქტიკის ჯგუფის პირველი შეხვედრა გაიმართა.

შეხვედრამ პრაქტიკის ჯგუფის 44 წევრს საშუალება მისცა ერთმანეთისთვის გაეზიარებინათ გამოცდილება ბავშვთა უფლებების საქმეებთან დაკავშირებით, გამოეკვეთათ მათ პრაქტიკაში არსებული ძირითადი პრობლემური საკითხები და ემსჯელათ, თუ როგორ შეიძლება ეს საკითხები გადაწყდეს არსებულ საკანონმდებლო ჩარჩოში.

შეერთებული შტატების ელჩმა საქართველოში, კელი დეგნანმა მოსამართლეებს მიმართა და განაცხადა: „ჩემთვის დიდი პატივია აქ ყოფნა და შთაბეჭდილება მოახდინა იმ ფაქტმა, რომ ბევრი თქვენგანი, ამ მშვენიერ შაბათს ხალისით მოვიდა და ყურადღება დაუთმო ამ ძალიან მნიშვნელოვან საკითხებს. მე, როგორც იურისტი, ნამდვილად დიდ პატივს ვცემ ამ პროფესიას და განსაკუთრებით მოსამართლეებს, იმ უზარმაზარი პასუხისმგებლობის გამო, რომელიც მათ აკისრიათ, როგორც კონსტიტუციის და ჩვენი დემოკრატიული პროცესების მცველებს. ერთადერთი გზა, რითაც ნებისმიერ ერს შეუძლია შეინარჩუნოს დემოკრატია, არის ის, თუ ცალკეულ მოსამართლეებს ექნებათ ყველა ინსტრუმენტი და ცოდნა, რომელიც საჭიროა კანონის უზენაესობის დასაცავად. ჩვენ ყველამ ვიცით, რომ სასამართლოს ლეგიტიმურობა დამოკიდებულია კვალიფიციური მოსამართლეების უნარზე, მიიღონ დასაბუთებული, დამოუკიდებელი გადაწყვეტილებები წარმოდგენილ მტკიცებულებებზე დაყრდნობით.“

ღონისძიებას გაუძღვა USAID სამართლის უზენაესობის პროგრამის, სასამართლო რეფორმის მრჩეველი, ინგა თოდრია. ასევე პრეზენტაციებს უძღვებოდნენ მოსამართლეები ქუთაისის საქალაქო სასამართლოდან (მიხეილ ბებიაშვილი), თბილისის სააპელაციო სასამართლოდან (შოთა გეწაძე, ნანა დარასელია), თბილისის საქალაქო სასამართლოდან (დავით წერეთელი, მანანა მესხიშვილი და თამარ ლაკერბაია) და საქართველოს უზენაესი სასამართლოდან (ეკატერინე გასიტაშვილი, ზურაბ ძლიერიშვილი და ბაკურიშვილი).

სხდომებს მოდერაციას უწევდნენ მოსამართლეები: დიანა ბერეკაშვილი (თბილისის სააპელაციო სასამართლო), ბადრი ნიპარიშვილი (თეთრიწყაროს რაიონული სასამართლო), ვლადიმერ ხუჭუა (თეთრიწყაროს რაიონული სასამართლო), თამარ ზამბახიძე (უზენაესი სასამართლო) და მანანა მესხიშვილი (თბილისის საქალაქო სასამართლო).

ხუთ მცირე ჯგუფში მუშაობა დაეხმარა ყველა მოსამართლეს შეეჯერებინათ საერთო პრობლემები, რომლებსაც ისინი აწყდებიან სასამართლო დარბაზებში.  კერძოდ, მათ გამოკვეთეს ბავშვებისთვის უფრო კვალიფიციური იურიდიული მრჩევლის და სოციალური მომსახურების სააგენტოს მეტი ჩართულობის აუცილებლობა სასამართლო პროცესებში, როგორც ბავშვთა საკითხებში ერთ-ერთი მთავარი გამოწვევა.

გარდა ამისა, მონაწილეებმა აღნიშნეს, რომ საჭიროა უფრო ერთგვაროვანი სასამართლო პრაქტიკა, რადგან სამოქალაქო საპროცესო კოდექსი და ბავშვის უფლებათა კოდექსი არ იძლევა საკმარის რეგულირებას ამ სფეროში. მონაწილეებმა ასევე შეიმუშავეს დოკუმენტის ,  რომელშიც მოცემულია გამოწვევების ჩამონათვალი და მათი გადაჭრის შესაძლო გზები და რომელიც სახელმძღვანელოდ იქნება გამოყენებული პრაქტიკის ჯგუფის მომავალ შეხვედრებსა და აქტივობებში.

შეხვედრის ფარგლებში, ბავშვთა უფლებებთან დაკავშირებულ საქმეებზე აშშ-ს პრეცედენტული სამართლის შესახებ მიღებული გამოცდილება და ცოდნა გააზიარეს ამერიკის შეერთებული შტატებიდან ახლახანს დაბრუნებულმა მოსამართლეებმა, ხაშურის რაიონული სასამართლოს თავმჯდომარემ მევლუდ ხათაშვილმა, მოსამართლე დავით წერეთელმა თბილისის საქალაქო სასამართლოდან და მოსამართლე დიანა ბერეკაშვილმა თბილისის სააპელაციო სასამართლოდან.  სასწავლო ტური მოსამართლეების მონაწილეობით ვაშინგტონში და ორეგონში USAID-ის სამართლის უზენაესობის პროგრამის მხარდაჭერით 2022 წლის სექტემბერში შედგა.