თბილისის საქალაქო სასამართლოს მენეჯერული პოზიციის მქონე თანამშრომლებმა საზოგადოებაზე ორიენტირებული მართლმსაჯულების შესახებ USAID სამართლის უზენაესობის პროგრამის მიერ გამართულ სემინარში მიიღეს მონაწილეობა. მონაწილეებს შორის იყვნენ სასამართლოს მენეჯერი და სამდივნოს ხელმძღვანელები.

USAID სამართლის უზენაესობის პროგრამის საზოგადოებრივი ჩართულობის მრჩეველმა, დოქტორმა ტიმ ბუნიევაცმა და საზოგადოებრივი ჩართულობის მენეჯერმა, ოლიკო შერმადინმა ჩაატარეს სესია სასამართლოს საქმიანობაში საზოგადოებრივი ჩართულობის კუთხით არსებული საერთაშორისო პრაქტიკის შესახებ და მონაწილეებს გააცნეს საზოგადოებაზე ორიენტირებული მართლმსაჯულების კონცეფცია და თეორია.

მონაწილეები სასამართლოების მიმართ საზოგადოების ნდობის გაზრდის მიზნით განხორციელებული წარმატებული აქტივობების მაგალითებს გაეცნენ.

დოქტორმა ბუნიევაცმა ისაუბრა საზოგადოებაზე ორიენტირებული მართლმსაჯულების კონცეფციაზე, მათ შორის შესაბამის თეორიულ თუ დიზაინის მიდგომებსა და სასამართლოების საქმიანობაში სხვადასხვა საზოგადოებრივი ჯგუფების ჩართულობის გაზრდის სტრატეგიებზე. მისი პრეზენტაცია მოიცავდა ტრადიციულ და პრობლემის გადაჭრაზე ორიენტირებულ სასამართლოებს შორის განსხვავებების შესწავლას; სასამართლოებში ადამიანზე ორიენტირებული დიზაინის ხუთი ქვაკუთხედის აღწერას; სასამართლოსა და საზოგადოებას შორის სასამართლოს გარეთ ურთიერთობის გაფართოების შესაძლო სფეროებს; სასამართლოს საზოგადოებრივი გამოკითხვის მაგალითებს; სასამართლო-სათემო მრჩეველთა საბჭოების როლსა და ფუნქციებს; და სასამართლოს საქმიანობაში საზოგადოებრივი ჩართულობის მხარდასაჭერად გარე დაინტერესებული მხარეების ჩართვის შესაძლებლობებს.

ოლიკო შერმადინმა მიმოიხილა საზოგადოებაზე ორიენტირებული მართლმსაჯულების ბოლოდროინდელი ინიციატივები, რომლებიც საქართველოს სასამართლოებში სამართლის უზენაესობის პროგრამის დახმარებით  დაინერგა და მონაწილეებს შესთავაზა სასამართლოს საქმიანობაში საზოგადოებრივი ჩართულობის გაზრდის მიზნით მსგავსი სტრატეგიების თბილისის რაიონულ სასამართლოში დანერგვის შესაძლებლობა განეხილათ. სესია დასრულდა თბილისის საქალაქო სასამართლოს მიერ ისეთი გზების იდენტიფიცირებაზე ფოკუსირებული ინტერაქტიული დისკუსიით, რომელთა საშუალებითაც სასამართლოს სერვისები უფრო ადამიანებზე/მომხმარებლებზე ორიენტირებული გახდება.