საქართველოს პროფესიული კავშირების გაერთიანებამ, USAID სამართლის უზენაესობის პროგრამის მიერ მხარდაჭერილი სტრატეგიული სამართალწარმოების პროექტის - „სამართალწარმოება, ადვოკატირება და ცნობიერების ამაღლება შრომით ურთიერთობებში თანასწორობის უზრუნველსაყოფად“ ფარგლებში, ქალთა შრომით უფლებებსა და საქართველოში გენდერულ თანასწორობაზე ვებინარი ჩაატარა.

პროფკავშირების გაერთიანების თავმჯდომარის მოადგილემ, რაისა ლიპარტელიანმა და მთავარი შრომის ინსპექტორის პირველმა მოადგილემ, ნატო ნათენაძემ, ისაუბრეს ქალთა შრომითი უფლებებისა და გენდერული თანასწორობის მიმართულებით განხორციელებულ ღონისძიებებზე. დისკუსიას მოდერაციას უწევდა პროფკავშირების გაერთიანების საზოგადოებასთან ურთიერთობის სამსახურის უფროსი ნინო რაზმაძე.

დისკუსია შეეხო არაფორმალურ დასაქმებას, მათ შორის, საშინაო/არაფორმალურ მშრომელებს, შრომის ბაზარზე არსებულ გამოწვევებს, უთანასწორობას, რომელსაც ქალები აწყდებიან ჯერ კიდევ წინასახელშეკრულებო ეტაპზე და სახელფასო განსხვავებას. ნატო ნათენაძემ მსმენელებს ასევე გაუზიარა ინფორმაცია შრომის ინსპექციის სამსახურისა და მისი მანდატის შესახებ.

მომხსენებლებმა უპასუხეს მსმენელთა სხვადასხვა კითხვას, მაგალითად,  არაფორმალურად დასაქმებულმა ქალებმა როგორ შეიძლება დაიცვან მათი უფლებები; შესაძლოა თუ არა შრომითი დისკრიმინაციის ფაქტზე სახალხო დამცველის ან შრომის ინსპექციისადმი მიმართვა დარჩეს ანონიმური; რა შრომის წესები ვრცელდება დეკრეტულ შვებულებაზე; ასევე, რა არის შრომის ინსპექციის მანდატი მიგრანტ ქალთა უფლებებთან დაკავშირებით.

ვებინარი ჩატარდა გენდერული ძალადობის წინააღმდეგ მიმართული 16-დღიანი გლობალური კამპანიის ფარგლებში, რომელიც ყოველწლიურად, 25 ნოემბრიდან 10 დეკემბრამდე პერიოდში იმართება.