საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, თელავში სამუშაო შეხვედრა (ბენჩ-ბარი) გამართა, რომელსაც 20 მონაწილე, მათ შორის მოსამართლეები, თანაშემწეები და მედიატორები ესწრებოდნენ. ისინი წარმოადგენდნენ კახეთის რეგიონს, კერძოდ თელავს, ყვარელს, გურჯაანსა და სიღნაღს.  შეხვედრა მიზნად ისახავდა თანამშრომლობის გაზრდას სასამართლოებსა და იმ პირებს შორის, რომლებიც საქართველოში დავის გადაწყვეტის ალტერნატიული მექანიზმების განვითარებას ისახავენ მიზნად.

შეხვედრა ირაკლი ყანდაშვილის, საქართველოს მედიატორთა ასოციაციის თავმჯდომარის, ირაკლი გელოვანის, USAID სამართლის უზენაესობის პროგრამის ADR მრჩევლისა და შალვა ჭკადუას, თელავის სახელმწიფო უნივერსიტეტის რექტორის მისასალმებელი სიტყვებით გაიხსნა. განხილვაში აქტიურად მონაწილეობდნენ თელავის რაიონული სასამართლოს თავმჯდომარე მარინე ცერცვაძე, გურჯაანის რაიონული სასამართლოს მოსამართლე გიორგი მთიულიშვილი და საგარეჯოსა და დედოფლისწყაროს მაგისტრატი მოსამართლე ალექსანდრე ლომიძე.

დისკუსია მედაციაში საქმეთა გადამისამართების თემაზე წარიმართა. მონაწილეთა თქმით, ამ მიმართულებით გაუმჯებესებაა. კახეთის რაიონული სასამართლოებიდან ახლადგახსნილ მედიაციის ცენტრებში 2023 წლის დეკემბრის შემდეგ 15 საქმე გადაიგზავნა. ამ დინამიკას ხელი შეუწყო პროგრამის მიერ 2023 წლის ნოემბერში საქმეთა მედიაციაში გადაცემის შესახებ ჩატარებულმა ტრენინგმა. 

მონაწილეებმა აღნიშნეს, რომ სიღნაღში არ არსებობს მედიაციის ცენტრი. მათი თქმით,  მოსამართლეებს არ აქვთ კონკრეტული მითითებები იმის შესახებ, თუ რომელ ცენტრში უნდა გადაამისამართონ საქმეები. ირაკლი ყანდაშვილმა მონაწილეებს მედიაციის ცენტრის შერჩევის კონკრეტული წესები შესთავაზა, რომლის მიხედვითაც საქმეების გადამისამართება უახლოეს ცენტრში უნდა მოხდეს (იმ შემთხვევაში, თუ მხარეები რომელიმე კონკრეტულ მედიაციის ცენტრს არ მიუთითებენ).  

მარინე ცერცვაძემ ხაზი გაუსვა მედიაციის მნიშვნელობას და აღნიშნა, რომ უპირატესობას ანიჭებს საქმეების მედიაციაზე გადაცემას მაშინაც კი, როცა ხედავს რომ საქმეს მისი ძალისხმევით გადაწყვეტის პოტენციალი გააჩნია. შეხვედრაზე ასევე განიხილეს მედიაციაზე გადაცემული საქმეების აღრიცხვის/რეგისტრაციის საკითხი, რითაც  ამ კუთხით საერთო პრაქტიკის ჩამოყალიბების აუცილებლობა გამოიკვეთა.

მონაწილეებმა თელავის, სიღნაღისა და გურჯაანის მედიატორების ჩართულობით ონლაინ მედიაციის საკითხზე იმსჯელეს და ერთმანეთს წარმატებული გამოცდილებები გაუზიარეს. დისკუსიისას აღინიშნა ფინანსური დავების მოგვარების სირთულე, განსაკუთრებით მცირე სასესხო/საკრედიტო საკითხების შესახებ, საოჯახო ან შრომით დავებთან შედარებით.