2023 წლის 9-10 დეკემბერს, USAID სამართლის უზენაესობის პროგრამამ ქუთაისსა და ბათუმში, იურიდიული დახმარების სამსახურთან (LAS) ერთად ტრენინგი ჩაატარა. ადამიანის უფლებების ძირითადი საკითხების შესახებ ტრენინგში 50 სტუდენტ-პარალეგალი მონაწილეობდა.

ტრენინგს უძღვებოდა ადამიანის უფლებათა ექსპერტი გიორგი ბურჯანაძე. მის პრეზენტაციაში, გიორგი ბურჯანაძემ ხაზი გაუსვა ადამიანის უფლებების დაცვის მნიშვნელობას ევროპულ სტანდარტებთან შესაბამისობაში, რათა ხელი შევუწყოთ საქართველოს ევროკავშირში ინტეგრაციას. ასევე, მან მონაწილეებს გაუზიარა ინფორმაცია ადამიანის უფლების შინაარსისა და მისი წარმოშობის თაობაზე საქართველოს დემოკრატიული რესპუბლიკის 1921 წლის კონსტიტუციასა და ადამიანის უფლებათა საყოველთაო დეკლარაციაში. ექსპერტის განმარტებით, ისინი ფუნდამენტური დოკუმენტებია, რომლებმაც ჩამოაყალიბეს ადამიანის უფლებათა დაცვის საკითხები საქართველოში.

გიორგი ბურჯანაძემ ასევე ისაუბრა ადამიანის ინდივიდუალური უფლებების შესახებ, როგორიცაა სიცოცხლის, საკუთრების, დისკრიმინაციის აკრძალვა, სამართლიანი სასამართლოს და სიტყვის თავისუფლების უფლება. მან მაგალითად მოიყვანა საქართველოს საკონსტიტუციო სასამართლოსა და ადამიანის უფლებათა ევროპული სასამართლოს პრეცედენტული საქმეები, ასევე აღნიშნა შრომითი უფლებებისა და ჯანმრთელობის უფლების დაცვის მნიშვნელობა. სტუდენტებმა ტრენინგზე გამართეს დებატები სიტყვის თავისუფლებასა და სიძულვილის ენას შორის ბალანსზე, განსაკუთრებით ციფრულ ეპოქაში.

2023 წელს ეს იყო ბოლო ტრენინგი სტუდენტი-პარალეგალებისთვის. 2024 წელს USAID სამართლის უზენაესობის პროგრამა და იურიდიული დახმარების სამსახური გეგმავენ ტრენინგების ჩატარებას შრომის უფლებების, მიწის რეგისტრაციის, სესხის/იპოთეკის ხელშეკრულებების, კომუნიკაციისა და პრეზენტაციის უნარების შესახებ. ასევე იგეგმება იმიტირებული სასამართლო პროცესი და საკონსულტაციო ვიზიტები საქართველოს იმერეთისა და აჭარის რეგიონებში.