2024 წლის 18 აპრილს, დამოუკიდებელი იურისტების ჯგუფმა და არასამთავრობო ორგანიზაციამ დემოკრატიის ინდექსი – საქართველო, USAID სამართლის უზენაესობის პროგრამის მხარდაჭერით,  სასამართლო კორპორატივიზმის თემაზე ონლაინ დისკუსია გამართეს, სადაც იტალიურ გამოცდილებაზე ისაუბრეს.

შეხვედრას ჩვიდმეტი მონაწილე, მათ შორის სასამართლო ექსპერტები, იურისტები და არასამთავრობო ორგანიზაციების წარმომადგენლები დაესწრნენ. მონაწილეებმა იტალიელ ექსპეტებთან ერთად სასამართლო კორპორატივიზმის მიზეზებისა და აღმოფხვრის გზებზე ისაუბრეს.

მაურიციო სალუსტრომ, ევროპის უსაფრთხოებისა და თანამშრომლობის ორგანიზაციის (ეუთო) უფროსმა იურიდიულმა მრჩეველმა სერბეთში, მეოცე საუკუნის დასაწყისიდან დღემდე იტალიის სასამართლო სისტემის ისტორია მიმოიხილა. ისტორიული კონტექსტის ანალიზის საშუალებით ექსპერტმა სასამართლო სისტემის ევლუციაზე მიაწოდა დამსწრეებს ინფორმაცია. მან აღნიშნა, რომ: „კორპორატივიზმი დიდი სურათის მხოლოდ ერთი ნაწილია; მნიშვნელოვანია გვესმოდეს როგორ არის მოწყობილი სასამართლო სისტემა, რადგან კორპორატივიზმს შეუძლია ითამაშოს როგორც უარყოფითი ასევე,  დადებითი როლი.”

ჯანფრანკო გალომ, რომის პროკურორის მოადგილემ, იტალიის მაგისტრატში პროკურორებისა და მოსამართლეების დანიშვნის პროცესის შესახებ ისაუბრა.  მან ხაზი გაუსვა დანიშვნის პროცესში დროთა განმავლობაში მომხდარ ცვლილებებს.  თუ ადრეულ პერიოდში ასაკი განსაზღვრავდა დაწინაურებას, ახლა ის დამსახურებაზე დაფუძნებული. მომხსენებელმა ასევე, ისაუბრა მოსამართლეთა შეფასებაზე; განსაკუთრებით ხაზი გაუსვა იმ გამოწვევებს, რომლებიც დაკავშირებულია ამ პროცესში მხოლოდ სტატისტიკური მონაცემების გამოყენებაზე.  აღინიშნა, რომ მიუხედავად იმისა, რომ სტატისტიკურ მონაცემებს შეუძლიათ მოსამართლეთა ან პროკურორების საქმიანობაზე ღირებული ინფორმაცია მოგვაწოდონ, მხოლოს ამ ინფორმაციაზე დაყრდნობით გადაწყვეტილების მიღება არ არის საკმარისი.

პრეზენტაციის შემდეგ გაიმართა დისკუსია, სადაც მონაწილეებმა იტალიური და ქართული გამოცდილება შეადარეს ერთმანეთს.

დისკუსიის ბმული: https://www.youtube.com/watch?v=5mByrnbH1gM&list=PLPM7bw_Z4aflRtspGIzSnU8HIk-Fuk-ZS&index=11