2024 წლის 21 მარტს, აკაკი წერეთლის სახელმწიფო უნივერსიტეტში გაიმართა დისკუსია გენდერული ძალადობის (GBV) და ოჯახში ძალადობის (DV) მსხვერპლთათვის ხელმისაწვდომი სერვისების შესახებ. USAID სამართლის უზენაესობის პროგრამისა (პროგრამა) და გაეროს ქალთა ორგანიზაციის საქართველოში ორგანიზებით, ღონისძიებამ ყურადღება გაამახვილა საქართველოში ქალთა გაძლიერების მიზნით ყოვლისმომცველი მხარდამჭერი სისტემებისა და ინიციატივების აუცილებლობაზე.

ნათია მესტვირიშვილმა, გაეროს ქალთა ორგანიზაციის მკვლევარმა ანალიტიკოსმა, წარმოადგინა 2022 წლის ქალთა მიმართ ძალადობის (VAW) გავრცელების კვლევის შედეგები, რომელიც ავლენს გენდერული ძალადობის საგანგაშო გავრცელებას საქართველოში. ეს დასკვნები ხაზს უსვამს მსხვერპლთა მხარდასაჭერად და ძალადობის წინააღმდეგ საბრძოლველად ეფექტური ინტერვენციების გადაუდებელ აუცილებლობას.

დისკუსიას, რომელსაც ქუთაისში პროგრამის რეგიონული იურისტი ანა შალამბერიძე უძღვებოდა, შეკრიბა ექსპერტები სხვადასხვა ორგანიზაციიდან, რომლებიც საქმიანობენ გენდერული და ოჯახში ძალადობის მსხვერპლთა დახმარების მიმართულებით.

თამთა ჩეჩელაშვილმა სახალხო დამცველის ქუთაისის რეგიონული ოფისის წარმომადგენელმა მიმოიხილა ინფორმაცია გენდერული და ქალთა მიმართ ძალადობის ინსტიტუტების როლის თაობაზე და ხაზი გაუსვა მსხვერპლთა ადვოკატირებისა და სამართლებრივი მხარდაჭერის მნიშვნელობას. ძალადობის მსხვერპლთა მომსახურების დაწესებულების (კრიზისული ცენტრი და თავშესაფარი) ხელმძღვანელმა ნინო ხონელიძემ გააზიარა კრიზისული ცენტრებისა და თავშესაფრების ძალისხმევა მსხვერპლი ქალების თავშესაფრისა და ყოვლისმომცველი მხარდაჭერის უზრუნველსაყოფად, ხაზი გაუსვა დაფინანსებისა და რესურსების გაზრდის აუცილებლობას მათი წვდომის გაფართოებისთვის. ქუთაისის იურიდიული დახმარების ბიუროს ხელმძღვანელმა ესმა ნორაკიამ განიხილა იურიდიული დახმარების გადამწყვეტი როლი მსხვერპლთათვის მართლმსაჯულების ხელმისაწვდომობის უზრუნველსაყოფად, განსაკუთრებით მოწყვლადი ჯგუფების პერსპექტივიდან, რომლებსაც შესაძლოა დამატებითი ბარიერები ჰქონდეთ. საქართველოს ახალგაზრდა იურისტთა ასოციაციის ქუთაისის ოფისის ხელმძღვანელმა დარინე სალდაძემ ისაუბრა საზოგადოებაზე დაფუძნებული ინიციატივებისა და საბაზო აქტივიზმის მნიშვნელობაზე ცნობიერების ამაღლებისა და მსხვერპლთა დახმარების ძიების გაძლიერებაში. გურანდა გვანცელაძემ, კულტურულ-ჰუმანიტარული ფონდის „სოხუმის“ მონიტორინგისა და ადვოკატირების სპეციალისტმა, ხაზი გაუსვა ადვოკატირებისა და პოლიტიკის რეფორმის მნიშვნელობას გენდერული და ოჯახში ძალადობის სისტემური საკითხების გადასაჭრელად.

შეხვედრაზე დისკუსიამ მოიცვა მრავალმხრივი მიდგომა, რომელიც აუცილებელია გენდერული ძალადობისა და ოჯახში ძალადობის ეფექტურად მოსაგვარებლად. ზოგიერთმა მონაწილემ აღნიშნა, რომ ყოვლისმომცველი მხარდაჭერის სერვისების, მათ შორის იურიდიული დახმარების, თავშესაფრების, კონსულტაციისა და ადვოკატირების მიწოდებით, სახელმწიფოს შეუძლია გააძლიეროს მსხვერპლი ქალები და შექმნას უფრო უსაფრთხო, მეტად სამართლიანი საზოგადოება ყველასთვის. დისკუსიის მონაწილეებმა აღნიშნეს, რომ სამთავრობო უწყებების, არასამთავრობო ორგანიზაციებისა და სამოქალაქო საზოგადოების ერთობლივი ძალისხმევა გადამწყვეტია მნიშვნელოვანი ცვლილებებისა და ძალადობის ციკლის დასასრულებლად.