ტოლერანტობის და მრავალფეროვნების ინსტიტუტმა (TDI), USAID სამართლის უზენაესობის პროგრამის მხარდაჭერით, ბათუმის შოთა რუსთაველის სახელობის სახელმწიფო უნივერსიტეტში შეხვედრა გამართა რელიგიისა და რწმენის თავისუფლების საკითხებზე. შეხვედრას 40-მდე სტუდენტი, ლექტორი და უნივერსიტეტის ადმინისტრაციის წარმომადგენელი ესწრებოდა.

მარიამ ღავთაძემ, TDI-ის სტრატეგიული სამართალწარმოების და ადვოკატირების პროგრამის დირექტორმა და მისმა კოლეგებმა დისკუსიისას ისაუბრეს საგანმანათლებლო და დასაქმების სფეროებში თანასწორობის, მათ შორის, რელიგიური და კულტურული მრავალფეროვნების უზრუნველყოფის საკითხებზე - როგორც საერთაშორისო სტანდარტებზე, ისე საქართველოს კანონმდებლობასა და არსებულ პრაქტიკაზე.

შეხვედრის მონაწილეები ასევე გაეცნენ USAID სამართლის უზენაესობის პროგრამის მხარდაჭერით მომზადებულ TDI-ის ორი კვლევის ძირითად მიგნებებს. პირველი კვლევა რელიგიურ/კულტურულ დღესასწაულებზე უქმე დღეებით სარგებლობის გარანტიებს, მეორე კი საჯარო სივრცეში, მათ შორის, სამუშაო ადგილზე და საგანმანათლებლო დაწესებულებებში რელიგიური სამოსისა და სიმბოლოების ტარებას ეხება.

შეხვედრისას სტუდენტებმა დასვეს კითხვები და გამოთქვეს მოსაზრებები, იმაზე თუ როგორ უნდა იყოს გარანტირებული რელიგიის თავისუფლება პრაქტიკაში და უზრუნველყოფილი სხვადასხვა რელიგიური და კულტურული საჭიროებები საგანმანათლებლო დაწესებულებებში და სამუშაო ადგილზე.

TDI-მ მსგავსი ფორმატის შეხვედრა თბილისის სახელმწიფო უნივერსიტეტშიც ჩაატარა და მომავალშიც გეგმავს დისკუსიების გამართვას რეგიონებისა და თბილისის სხვა უნივერსიტეტებში.