თბილისის თავისუფალი უნივერსიტეტის სამართლის სკოლამ (FreeUni), სამცხე-ჯავახეთის სახელმწიფო უნივერსიტეტთან თანამშრომლობით, ახალციხეში საჯარო ლექცია ჩაატარა. ლექციის თემა, რომელსაც ნონა კალანდაძე (სამცხე-ჯავახეთის სახელმწიფო უნივერსიტეტის მოწვეული ლექტორი) და ვასილ ჟიჟიაშვილი (FreeUni-ის მოწვეული ლექტორი) უძღვებოდნენ, კონფლიქტი გამოხატვის თავისუფლებასა და რელიგიის თავისუფლებას შორის იყო.

კალანდაძემ ისაუბრა გამოხატვის თავისუფლების ისტორიასა და არსზე, მის მნიშვნელობაზე დემოკრატიულ საზოგადოებაში, ხოლო ჟიჟიაშვილმა რელიგიის თავისუფლების მორალურ ასპექტებსა და ამ ორ უფლებას შორის არსებულ სამართლებრივ კონფლიქტსა და ბალანსზე.

საჯარო ლექციას სამცხე-ჯავახეთის სახელმწიფო უნივერსიტეტის 100-მდე სტუდენტი დაესწრო, რომლებიც აქტიურ დებატებში ჩაერთნენ იმის თაობაზე, თუ რა შეიძლება ჩაითვალოს რელიგიური გრძნობების შეურაცხჰყოფად და როდის უნდა გადაწონოს აღნიშნული უფლების დაცვა გამოხატვის თავისუფლების დაცვამ.

ეს ლექცია იყო FreeUni-ს მიერ, USAID სამართლის უზენაესობის პროგრამის მხარდაჭერით, მიმდინარე პროექტის ფარგლებში განხორციელებული აქტივობების ნაწილი, რომელიც ითვალისწინებს იურიდიული განათლების ხარისხის ამაღლებას თბილისში და რეგიონებში სტუდენტებზე ორიენტირებული პრაქტიკული სწავლების, კვლევისა და თანამშრომლობის გზით.

პროექტის ფარგლებში FreeUni თანამშრომლობს სამცხე-ჯავახეთისა და ბათუმის სახელმწიფო უნივერსიტეტებთან, აერთიანებს და რთავს მათ სტუდენტებს კვლევებში, საკონსტიტუციო სასამართლოსთვის სასამართლოს მეგობრის მოსაზრების შედგენასა და ისეთ აქტივობებში, როგორიცაა საჯარო ლექციები, იმიტირებული სასამართლო პროცესები და საზაფხულო სკოლები.