გიწვევთ 2023 წლის 22-26 იანვარს  მართლმსაჯულების 2023 წლის სკოლაში მონაწილეობისთვის. მართლმსაჯულების სკოლა ტარდება საქართველოს იუსტიციის უმაღლესი სკოლის ეგიდით, USAID  სამართლის უზენაესობის პროგრამის, სამხრეთ კავკასიაში გაეროს ადამიანის უფლებათა უმაღლესი კომისარიატის ოფისის და ევროპის საბჭოს სასამართლოს რეფორმის პროექტის მხარდაჭერით.

მართლმსაჯულების სკოლის მონაწილეები არიან საერთო სასამართლოების სამართლებრივი უზრუნველყოფის  თანამშრომლები. დამატებით 5 მონაწილე შეირჩევა კონკურსანტებისგან, რომლებიც არ არიან დასაქმებულები საერთო სასამართლოების სისტემაში, არიან სამართლის საბაკალავრო სწავლების დამამთავრებელი კურსის სტუდენტები ან სამაგისტრო სწავლების სტუდენტები (შერჩევის კრიტერიუმები დეტალურად იხილეთ დაბლა).  

2023 წლის მართლმსაჯულების სკოლის მთავარი მიზანიამონაწილეთა შესაძლებლობების გაძლიერება ადამიანის უფლებათა სამართლის, საერთაშორისო და ევროპული სასამართლო სტანდარტების მიმართულებით. მართლმსაჯულების სკოლა მიზნად ისახავს მონაწილეთა როგორც თეორიული ცოდნის, ასევე პრაქტიკული უნარ-ჩვევების გაძლიერებას და მოიცავს ისეთ თემებს, როგორიცაა საქართველოს საკონსტიტუციო სასამართლოსა და ადამიანის უფლებათა ევროპული სასამართლოს უახლესი პრაქტიკა, ბავშვთა უფლებები, დისკრიმინაციის აკრძალვასთან დაკავშირებული ეროვნული და საერთაშორისო სტანდარტები, გამოხატვის თავისუფლება, პირადი და ოჯახური ცხოვრების ხელშეუხებლობა, სამეწარმეო სამართლის აქტუალური საკითხები, მათ შორის სამართლებრივი წერა და გადაწყვეტილებების დასაბუთება.

მართლმსაჯულების სკოლის მომხსენებლები არიან მოწვეული საერთაშორისო და ადგილობრივი ექსპერტები. 2023 წლის მართლმსაჯულების სკოლის პროგრამით ასევე გათვალისწინებულია პრაქტიკული დავალებების შესრულება, რომლის საფუძველზე გამოვლინდებიან სკოლის საუკეთესო მონაწილეები. 

სამუშაო ენა: ქართული/ინგლისური.

მართლმსაჯულების სკოლაში მონაწილეობისთვის ვიწვევთ:

• სამართლის საბაკალავრო სწავლების დამამთავრებელი კურსის ან სამართლის სამაგისტრო სწავლების სტუდენტებს;
• რომლებიც, დაინტერესებული არიან საერთო სასამართლოების სისტემის ფუნქციონირებით.

დაინტერესებულმა პირებმა 2022 წლის 11 დეკემბრის ჩათვლით  შემდეგ ელექტრონულ მისამართზე judiciaryreform.georgia@coe.int უნდა წარმოადგინონ CV და სამოტივაციო წერილი (ქართულ ან ინგლისურ ენაზე), ასევე ინგლისური ენის B2 დონეზე ცოდნის დამადასტურებელი დოკუმენტი. გთხოვთ სათაურის ველში მიუთითოთ „მართლმსაჯულების სკოლა 2023 - სტუდენტი“.

* 2023 წლის მართლმსაჯულების სკოლაში მონაწილეობას ვერ მიიღებენ წინა წლების სკოლების მონაწილეები. 

მართლმსაჯულების სკოლაში მონაწილეთა შესარჩევი კონკურსი ჩატარდება ორ ეტაპად:

I ეტაპი - წარმოდგენილი დოკუმენტაციის საფუძველზე კონკურსანტების შერჩევა;

II ეტაპი - გასაუბრება შესარჩევ კომისიასთან.  

მართლმსაჯულების სკოლა ჩატარდება ქალაქგარეთ და მასში მონაწილეობასთან დაკავშირებული ხარჯების ანაზღაურებას უზრუნველყოფენ სკოლის მხარდამჭერი ორგანიზაციები. 

დამატებითი კითხვებისთვის შეგიძლიათ მოგვმართოთ მითითებული ელ.ფოსტის მისამართზე judiciaryreform.georgia@coe.int