მეექვსე მართლმსაჯულების ზამთრის სკოლა, რომელიც 2023 წლის 22-26 იანვარს მიმდინარეობდა, დასრულდა. სკოლამ ოცი მოსამართლის თანაშემწის, სასამართლოს ანალიტიკური ქვედანაყოფების წარმომადგენლის, სასამართლოში სტაჟიორად მომუშავე პირისა და იურიდიული ფაკულტეტის დამამთავრებელი სტუდენტების თეორიული ცოდნა და პრაქტიკული უნარ-ჩვევები გააუმჯობესა.

მართლმსაჯულების სკოლა ჩატარდა იუსტიციის უმაღლესი სკოლის ეგიდით, რომლის თანაორგანიზატორები იყვნენ USAID სამართლის უზენაესობის პროგრამა, ევროპის საბჭო (CoE) და სამხრეთ კავკასიაში გაეროს ადამიანის უფლებათა უმაღლესი კომისრის ოფისი (UN OHCHR).

თერთმეტი მოწვეული ექსპერტის მიერ განხილული თემები მოიცავდა - საქართველოს საკონსტიტუციო სასამართლოსა და ადამიანის უფლებათა ევროპული სასამართლოს უახლეს პრაქტიკას, ბავშვთა უფლებებს, დისკრიმინაციის აკრძალვის ეროვნულ და საერთაშორისო სტანდარტებს, გამოხატვის თავისუფლებას, პირადი და ოჯახური ცხოვრების ხელშეუხებლობის საკითხებს, ბიზნეს სამართლის აქტუალურ საკითხებს, სამართლებრივ წერას, განაჩენის გამოტანასა და გადაწყვეტილების მიღებას.

USAID სამართლის უზენაესობის პროგრამის ხელმძღვანელის მოადგილემ, ნილ ვაინსტაინმა მისასალმებელ სიტყვაში განაცხადა, რომ "პროგრამის ერთ-ერთი მიზანია ინდივიდუალური მოსამართლეებისა და სასამართლო პერსონალის შესაძლებლობების განვითარებაა. ზამთრის სკოლა, რომელსაც 2018 წლიდან USAID მხარს უჭერს, ამ ძალისხმევის ნაწილია. ჩვენი მხარდაჭერა ზამთრის სკოლის მიმართ არის სასამართლოს თანაშემწეების და სასამართლოს სხვა პერსონალის მნიშვნელოვანი როლის აღიარება საქართველოს სასამართლო სისტემაში, ისევე როგორც, ქვეყანაში პროფესიონალი და დამოუკიდებელი მოსამართლეებისა და სასამართლო პერსონალის არსებობის მნიშვნელობა.“

„მართლმსაჯულების სკოლა, რომელსაც დაარსების დღიდან მხარს უჭერს ევროსაბჭო, არის უნიკალური პლატფორმა, რომელიც საშუალებას აძლევს სამართლის პროფესიონალებს განაგრძონ თავიანთი პროფესიული განვითარება, რითაც გააუმჯობესებენ თავიანთ ცოდნასა და უნარები. ის ასევე შესაძლებლობას აძლევს სამართლის პროფესიონალებს იურთიერთონ სხვა სასამართლოებში მსგავს პოზიციაზე მომუშავე პირებთან, რათა ერთმანეთს გაუზიარონ საუკეთესო პრაქტიკა და გამოცდილება.“ – განაცხადა უშანგი ბახტაძემ, ევროკავშირისა და ევროპის საბჭოს თანადაფინანსებული პროექტის „საქართველოში სასამართლო რეფორმის ხელშეწყობის“ პროექტის უფროსმა ოფიცერმა.

„OHCHR-ს აქვს მანდატი, ადამიანის უფლებათა საყოველთაო დეკლარაციიდან გამომდინარე, რომლის 75 წლის იუბილესაც წელს აღვნიშნავთ, ხელი შეუწყოს და დაიცვას ყველა ადამიანის მიერ ადამიანის უფლებებით სარგებლობა და მათი სრული რეალიზაცია. სასამართლო ხელისუფლების შესაძლებლობების გაძლიერება იყო და დარჩება OHCHR-ის ერთ-ერთ პრიორიტეტად. მოხარული ვართ, რომ გავაგრძელებთ ამ ინიციატივის მხარდაჭერას და ვიმედოვნებთ, რომ ზამთრის სკოლა საშუალებას მისცემს მონაწილეებს შეიძინონ არა მხოლოდ თეორიული ცოდნა, არამედ პრაქტიკული ხერხები, რათა იმოქმედონ სამართლიანი სასამართლოს პრინციპების დაცვის სულისკვეთებით“, -  აღნიშნა საქართველოში გაეროს ადამიანის უფლებათა უმაღლესი კომისრის ოფისის პროექტების მენეჯერმა, სოფო ბენაშვილმა. 

ზამთრის სკოლის დასასრულს მონაწილეებს ჩაუტარდათ ტესტირება, რომელთა საფუძველზეც გამოვლინდება პირველი და მეორე ადგილის მფლობელი. პირველი ადგილის მფლობელი ათ სამოქალაქო და ადმინისტრაციულ ქართველ მოსამართლესთან ერთად შეუერთდება სასწავლო ტურს აშშ-ში. მეორე ადგილის მფლობელი კი ეწვევა ადამიანის უფლებათა ევროპულ სასამართლოს და ევროპის საბჭოს სტრასბურგში (საფრანგეთი) რათა შეისწავლოს ადამიანის უფლებათა დაცვის მექანიზმები ევროპაში.