USAID სამართლის უზენაესობის პროგრამის ექსპერტმა რადოსლავ პროჩაზკამ დაასრულა ოთხდღიანი ვიზიტი საქართველოში, რომლის დროსაც მან შეისწავლა საქართველოს საკონსტიტუციო სასამართლოს (სსკ) სამართალწარმოების გამოწვევები და საქმეების განხილვის განრიგის შედგენის პრაქტიკა. მიღებული ინფორმაცია საშუალებას მისცემს ექსპერტს მოამზადოს რეკომენდაციები იმის შესახებ, თუ როგორ შეიძლება გაუმჯობესდეს საკონსტიტუციო სასამართლოს არსებული პრაქტიკა და მინიმუმამდე იქნეს დაყვანილი სუბიექტურობის რისკები საქმის განხილვის დაგეგმვის, მოსმენების გადადების, განხილვისა და გადაწყვეტილების მიღების დროს.
ბ-ნი პროჩაზკა შეხვდა საქართველოს სახალხო დამცველის მოადგილეს გიორგი ბურჯანაძეს (7 სექტემბერი), სამოქალაქო საზოგადოების წარმომადგენლებს, რომლებიც ეწევია სტრატეგიულ სამართალწარმოებას საკონსტიტუციო სასამართლოში (8 სექტემბერი) და საკონსტიტუციო სასამართლოს თავმჯდომარეს, მოსამართლეებს და სამართლებრივ მრჩევლებს (9 სექტემბერი).
„მიმაჩნია, რომ საქართველოს საკონსტიტუციო სასამართლოს აქვს პოტენციალი, ითამაშოს გადამწყვეტი როლი საქართველოს დემოკრატიის წინსვლაში, რადგან ეს არის სასამართლო, რომელიც იძლევა გარანტიას, რომ ურთიერთკონტროლისა და გაწონასწორების სისტემა იმუშავებს და ადამიანის უფლებები არ დაირღვევა საკანონმდებლო ორგანოში წარმოდგენილი უმრავლესობის სურვილისამებრ. მე ვიცი, რომ თქვენი სასამართლო ადგენს მნიშვნელოვან პრეცედენტებს დემოკრატიის წინსვლისთვის ამ ქვეყანაში. ყველას გვაქვს მოლოდინი, რომ ასევე გააგრძელებთ და ყველა თქვენი მომავალი გადაწყვეტილება ნაკარნახევი იქნება საქართველოს საუკეთესო ინტერესებითა და მისი დემოკრატიზაციის მიზნებით. ვიმედოვნებ, რომ ექსპერტის ჩართულობა მნიშვნელოვან გამოუმჯობესებას გამოიწვევს სამართალოწარმოებაში სასამართლოსთვის, მისი მომხმარებლებისთვის და იმ მოქალაქეებისთვის, რომლებიც აღძრავენ საქმეებს საკონსტიტუციო სასამართლოში.” - განაცხადა USAID-ის საქართველოს დემოკრატიის, უფლებებისა და მმართველობის ოფისის დირექტორმა ლეა კაპლანმა მისასალმებელი კომენტარებში საკონსტიტუციო სასამართლოს წარმომადგენლებთან შეხვედრისას.
დისკუსია ეხებოდა საქართველოს საკონსტიტუციო სასამართლოს სამართალწარმოების საკანონმდებლო ჩარჩოსა და არსებულ პრაქტიკას. შეხვედრის მოდერატორი იყო USAID სამართლის უზენაესობის პროგრამის სასამართლო რეფორმის სპეციალისტი ეკა ონიანი.
ექსპერტის კითხვების შემდეგ, საკონსტიტუციო სასამართლოს ხუთმა მოსამართლემ გამოთქვა მოსაზრებები იმის შესახებ, თუ როგორ შეიძლება გაუმჯობესდეს საქმეთა განხილვის განრიგის შედგენის არსებული პრაქტიკა სასამართლო პროცედურებში მნიშვნელოვანი საკანონმდებლო ცვლილებებით ან მის გარეშე. ექსპერტმა გაიზიარა წუხილი, რომ გადაწყვეტილებების მიღების პროცესში შეფერხებებმა და განუხილველი საქმეების რაოდენობის ზრდამ შეიძლება გავლენა იქონიოს სასამართლოს რეპუტაციაზე. შეხვედრაზე იმსჯელეს ამ შეფერხებების მიზეზების შესახებ, რამაც ბევრი საინტერესო და აქტუალური საკითხი წამოჭრა დისკუსიის განმავლობაში.