2022 წლის 22 ივნისს, საერთაშორისო სამართლებრივი ფონდის (ILF) პირველი გრძელვადიანი ექსპერტი ალან დალი, ILF-ის პროგრამის უფროს დირექტორ, ჰოლი ჰობარტთან ერთად საქართველოში ჩამოვიდა. USAID სამართლის უზენაესობის პროგრამის მეშვეობით საქართველოში ყოფნისას, მომდევნო ექვსი თვის განმავლობაში ალან დალი ინტენსიურად იმუშავებს იურიდიული დახმარების სამსახურთან. იგი დაეხმარება სამსახურს ხარისხის შეფასების სისტემის გაუმჯობესებაში და მენტორობას გაუწევს იურისტებს.

27 ივნისს ექსპერტები შეხვდნენ სამსახურის დირექტორ რაჟდენ კუპრაშვილს და დირექტორის მოადგილეებს ნინო მელაძეს და დავით სიმონიას. მხარეებმა ერთმანეთს გამოცდილება და მოლოდინები გაუზიარეს მომავალ თანამშრომლობასთან დაკავშირებით. ექსპერტებმა თბილისისა და რუსთავის იურიდიული დახმარების ბიუროები მოინახულეს და ქუთაისში სასწავლო ცენტრის გახსნას დაესწრნენ. ექსპერტები თბილისის გარეთ სხვა ბიუროებშიც გაემგზავრებიან და ადგილზე შეხვდებიან სამსახურის იურისტებს.

ILF-ს იურისტებისთვის მაღალი ხარისხის წარმომადგენლობის განხორციელებაში დახმარების დიდი გამოცდილება აქვს, რაც ხელს უწყობს მართლმსაჯულების სისტემების გარდაქმნას და კანონის უზენაესობის გაძლიერებას. ალან დალი არის გამოცდილი ადვოკატი, რომელმაც 20 წელზე მეტი იმუშავა კანადაში, სანამ 22 წლის წინ საერთაშორისო სამართლებრივი დახმარების პროექტებში ჩაერთვებოდა იურიდიული დახმარების სისტემების გაუმჯობესების მიზნით. მისი ფართო საერთაშორისო გამოცდილება მოიცავს ლათინურ ამერიკას (ჩილე, პერუ, ეკვადორი, არგენტინა, ბოლივია, გვატემალა, ჰონდურასი), ავღანეთსა და ფილიპინებს. ჰონდურასში ის ასევე მუშაობდა მართლმსაჯულების ხელმისაწვდომობის, აღდგენითი მართლმსაჯულების და სკოლაში ძალადობის პრევენციის საკითხებზე.