USAID სამართლის უზენაესობის პროგრამა უზრუნველყოფს იურიდიული დახმარების სამსახურისთვის მუდმივ მხარდაჭერას, მათ შორის საერთაშორისო ექსპერტების მოწვევითა და საჭიროების შემთხვევაში, რიგი ტექნიკური დახმარების გაწევით. 2023 წლის 21 მარტს, საერთაშორისო სამართლებრივი ფონდის პირველი მენტორი, ქეით კონიერსი, ჩამოვიდა საქართველოში სამსახურთან თანამშრომლობისთვის.

მომდევნო სამი თვის განმავლობაში ქეით კონიერსი განთავსდება ქუთაისში და ინტენსიურად იმუშავებს იურიდიული დახმარების სამსახურის ქუთაისის ბიუროსთან, ისევე როგორც სხვა ბიუროებთან საქართველოს დასავლეთ ნაწილში. იგი მენტორობას გაუწევს სამსახურის იურისტებს და აგრეთვე, მისი, როგორც საპროცესო ადვოკატის გამოცდილებას გაუზიარებს.

ფონდთან პარტნიორობის ფარგლებში, USAID სამართლის უზენაესობის პროგრამას საქართველოში უკვე ჰყავს მოწვეული ალან დალი, ფონდის პროგრამის დირექტორი საქართველოში. ჩამოსვლის დღიდან ის მუშაობს იურიდიული დახმარების სამსახურთან ხარისხის შეფასების სისტემის გაუმჯობესებისა და  ქვეყნის აღმოსავლეთ ნაწილში სამსახურის იურისტებისთვის მენტორობის გაწევის მიზნით.

22 მარტს, სანამ ქეით კონიერსი ქუთაისში მუშაობას შეუდგებოდა, ის და ალან დალი შეხვდნენ იურიდიული დახმარების სამსახურის დირექტორს დავით სიმონიას. 27 მარტს, ქალბატონი კონიერსი ქუთაისისა და ზესტაფონის ბიუროებს ეწვია სამომავლო თანამშრომლობის მოლოდინების განსახილველად.

ქეით კონიერსი გამოცდილი ადვოკატია, რომელიც საერთაშორისო სამართლებრივი ფონდის ფარგლებში მენტორად მიანმარში მუშაობდა . მას დიდი გამოცდილება აქვს სისხლისა და სამოქალაქო სამართლის საქმეებში, მათ შორის საოჯახო დავებში, წვრილმან საქმეებსა და გამქირავებელსა და დამქირავებელს შორის წამოჭრილ დავებში. იგი ასევე მსახურობდა წვრილმან სამოქალაქო საქმეებზე  მოსამართლედ ექვსი წლის განმავლობაში და არაერთხელ დაჯილდოვდა მისი პროფესიული საქმიანობისთვის.