USAID სამართლის უზენაესობის პროგრამის დახმარებით, ქუთაისის საქალაქო და სააპელაციო სასამართლოების მოსამართლეებსა და ადგილობრივ მედიატორებს შორის შეხვედრა გაიმართა. 

შეხვედრამ საშუალება მისცა 8 მოსამართლესა და 6 მედიატორს, რომ გაეცნოთ ერთმანეთი, ესაუბრათ მედიაციასთან მიმართებაში არსებულ მოლოდინებზე და განეხილათ, თუ რა ტიპის საქმეებია სამედიაციო, რა ეტაპების გავლაა საჭირო და რა მეთოდების გამოყენებაა აუცილებელი იმისთვის, რომ მოხდეს მხარეების დარწმუნება, რათა მათ სცადონ მედიაცია.

შეხვედრას ასევე ესწრებოდნენ ქუთაისის საქალაქო სასამართლოს მენეჯერი და ქუთაისის სააპელაციო სასამართლოს აპარატის წარმომადგენლები, რომლებიც აღნიშნულ სასამართლოებში არსებულ მედიაციის ცენტრებს კოორდინაციას გაუწევენ. 

მისალმებისას თამარ იმნაიშვილმა, საქართველოს მედიატორთა ასოციაციის აღმასრულებელმა მდივანმა ისაუბრა ორგანიზაციის ძალისხმევაზე, რაც მიმართულია მედიაციის ცენტრების კოორდინატორების დახმარებაზე, რათა მოხდეს გამოცდილების გაზიარება და მედიაციის ხელშეწყობა, ასევე მათი საქმიანობის ეფექტიანად წარმართვა. 

მოსამართლეებმა გამოთქვეს სურვილი, რომ მათ მეტი შესაძლებლობა ჰქონდეთ სხვა სასამართლოების მოსამართლეების გამოცდილების გაზიარების თვალსაზრისით. მათ ასევე აღნიშნეს, რომ საჭიროა, თანაშემწეების უნარების გაძლიერება მედიაციის მიმართულებით, რათა მათ შეძლონ მხარეებისთვის მედიაციის სარგებლის შესახებ ინფორმაციის მიწოდება. კიდევ ერთი საჭიროება, რომელიც ყველა მონაწილემ დააფიქსირა, არის ცნობიერების ამაღლება მედიაციის, როგორც პროცესის, ასევე მედიატორების, როგორც პროფესიონალების შესახებ, რათა მხარეებმა და მათმა წარმომადგენლებმა მეტი ღიაობა გამოიჩინონ მედიაციის მიმართ. 

შეხვედრას უძღვებოდნენ მედიაციის ექსპერტი ეთერ ჩაჩანიძე და USAID სამართლის უზენაესობის პროგრამის ADR მრჩეველი, სოფო ტყემალაძე.