საქართველოს პარლამენტის იურიდიულ საკითხთა კომიტეტის თავმჯდომარის მოადგილემ, რატი იონათამიშვილმა წარადგინა ანგარიში სამუშაო და საჯარო სივრცეში სექსუალური შევიწროების ამკრძალავი ნორმატიული აქტების აღსრულების კონტროლის („ნააკ“) შესახებ გენდერული თანასწორობის მუდმივმოქმედი საპარლამენტო საბჭოს სხდომაზე.

ანგარიში მომზადდა საქართველოს პარლამენტის იურიდიულ საკითხთა კომიტეტისა და ადამიანის უფლებათა დაცვისა და სამოქალაქო ინტეგრაციის კომიტეტის მიერ 2021 წელს, USAID/PROLoG-ის ექსპერტის, მარიამ გაიპარაშვილის, მონაწილეობით.

რატი იონათამიშვილმა აღნიშნა, რომ სექსუალური შევიწროება კვლავ კრიტიკულ საკითხად რჩება საქართველოს მოქალაქეებისთვის, განსაკუთრებით ქალებისთვის, როგორც საჯარო სფეროში, ასევე შრომითი ურთიერთობების დროს. მან ასევე აღნიშნა, რომ ხშირ შემთხვევაში კანონი სრულ ჰარმონიზაციაშია საერთაშორისო სტანდარტებთან, თუმცა ეს საკმარისი არ არის უზრუნველყოს პროპორციული სამართლებრივი პროცესების წარმართვა აღნიშნულ საკითხებზე.

„მიუხედავად იმისა, რომ ჩვენ მიერ განხორციელებული საკანონმდებლო ცვლილებები დადებითად იქნა შეფასებული, მათ შორის დაინტერესებული მხარეების მიერ, ფაქტია, რომ სექსუალური შევიწროების მსხვერპლთა უფლებების დაცვა რჩება მთავარ გამოწვევად. ჩვენი ვალდებულებაა არა მხოლოდ კონკრეტულ ფაქტებზე რეაგირება, არამედ მუშაობა ამ საკითხზე მანამ, სანამ ნებისმიერი მსხვერპლი, რომელიც თავს დამცირებულად ან ღირსებაშელახულად გრძნობს, აუცილებლად შეძლებს დაიცვას საკუთარი უფლებები “. - განაცხადა მან.

“ნააკ“-ში ჩართული იყო სხვადასხვა დაინტერესებული მხარე, რომლებმაც წარმოადგინეს წერილობითი მოსაზრებები აღნიშნული სამართლებრივი ნორმების შესრულების შესახებ და მონაწილეობა მიიღეს საჯარო შეხვედრებში: საერთო სასამართლოები, სახალხო დამცველის აპარატი, შინაგან საქმეთა სამინისტრო, შრომის ინსპექციის სამსახური, კოალიცია თანასწორობისთვის, ექსპერტები და სამოქალაქო საზოგადოების წარმომადგენლები.

“ნააკ“-ის ფარგლებში გაცემულია არაერთი რეკომენდაცია. ერთ-ერთი წარმოადგენს საკანონმდებლო ცვლილებების ამოქმედებას არასრულწლოვანთა მიმართ სექსუალური შევიწროების შემთხვევების განსაკუთრებული სიფრთხილით განხილვის უზრუნველსაყოფად, მათ შორის არასრულწლოვნებთან არასასურველი სიტყვიერი/არავერბალური კონტაქტისთვის ჯარიმების სავალდებულო ზედა ზღვარის შეცვლას სასჯელებით, რომლებიც შეიძლება მოიცავდეს ჯარიმას, გამასწორებელ სამუშაოებს ერთ თვემდე ვადით ან/და ადმინისტრაციულ პატიმრობას. ასევე, უნდა გაიზარდოს ადმინისტრაციული ჯარიმის ოდენობა და მოცემული იყოს მისი დიაპაზონი,  რათა მოსამართლეებმა დააწესონ ჯარიმა ქცევის სიმძიმის მიხედვით. კერძო და საჯარო დაწესებულებებმა უნდა დანერგონ დისკრიმინაციისა და სექსუალური შევიწროების პრევენციის მექანიზმები თავიანთ სამუშაო გარემოში. ასევე, სექსუალური შევიწროების შესახებ ცნობიერების ამაღლებისთვის მეტი ზომები უნდა იქნას მიღებული.

სამართლის უზენაესობის პროგრამა დაეხმარება ადამიანის უფლებათა და სამოქალაქო ინტეგრაციისა და იურიდიულ საკითხთა კომიტეტებს, რეკომენდაციების საფუძველზე, ადმინისტრაციული და სამოქალაქო სამართლის სფეროში საკანონმდებლო ცვლილებების შემუშავებაში.