ხაშურის რაიონული სასამართლოს თანამშრომლებმა, მათ შორის სამმა მოსამართლემ, საზოგადოებაზე ორიენტირებული მართლმსაჯულების შესახებ USAID სამართლის უზენაესობის პროგრამის მიერ გამართულ სემინარში მიიღეს მონაწილეობა.

USAID სამართლის უზენაესობის პროგრამის საზოგადოებრივი ჩართულობის მრჩეველმა, დოქტორმა ტიმ ბუნიევაცმა და საზოგადოებრივი ჩართულობის მენეჯერმა, ოლიკო შერმადინმა ჩაატარეს სესია სასამართლოს საქმიანობაში საზოგადოებრივი ჩართულობის კუთხით არსებული საერთაშორისო პრაქტიკის შესახებ და მონაწილეებს გააცნეს საზოგადოებაზე ორიენტირებული მართლმსაჯულების კონცეფცია და თეორია. მონაწილეები სასამართლოების მიმართ საზოგადოების ნდობის გაზრდის მიზნით განხორციელებული წარმატებული აქტივობების მაგალითებს გაეცნენ.

სემინარი იყო საინტერესო და გამოწვევებით აღსავსე, როგორც ინტელექტუალური, ისე პრაქტიკული თვალსაზრისით. დოქტორმა ბუნიევაცმა ისაუბრა საზოგადოებაზე ორიენტირებული მართლმსაჯულების კონცეფციაზე, მათ შორის შესაბამის თეორიულ თუ დიზაინის მიდგომებსა და სასამართლოების საქმიანობაში სხვადასხვა საზოგადოებრივი ჯგუფების ჩართულობის გაზრდის სტრატეგიებზე. ეს ყოველივე მოიცავდა ტრადიციულ და პრობლემის გადაჭრაზე ორიენტირებულ სასამართლოებს შორის განსხვავებების შესწავლას; სასამართლოებში ადამიანზე ორიენტირებული დიზაინის ხუთი ქვაკუთხედის აღწერას; სასამართლოსა და საზოგადოებას შორის სასამართლოს გარეთ ურთიერთობის გაფართოების შესაძლო სფეროებს; სასამართლოს საზოგადოებრივი გამოკითხვის მაგალითებს; სასამართლო-სათემო მრჩეველთა საბჭოების როლსა და ფუნქციებს; და სასამართლოს საქმიანობაში საზოგადოებრივი ჩართულობის მხარდასაჭერად გარე დაინტერესებული მხარეების ჩართვის შესაძლებლობებს.

ოლიკო შერმადინმა მიმოიხილა საზოგადოებაზე ორიენტირებული მართლმსაჯულების ბოლოდროინდელი ინიციატივები, რომლებიც საქართველოს სასამართლოებში სამართლის უზენაესობის პროგრამის დახმარებით  დაინერგა და მონაწილეებს შესთავაზა სასამართლოს საქმიანობაში საზოგადოებრივი ჩართულობის გაზრდის მიზნით მსგავსი სტრატეგიების ხაშურის რაიონულ სასამართლოში დანერგვის შესაძლებლობა განეხილათ. 

სესია დასრულდა ინტერაქტიული დისკუსიით, რომელიც ფოკუსირებული იყო სასამართლოს ჩართულობის წარმატებული სტრატეგიისა და სამოქმედო გეგმის ელემენტების იდენტიფიცირებაზე. მონაწილეებმა გამოთქვეს სურვილი უახლოეს მომავალში დაესწრონ ინტერაქტიულ ვორქშოფს, სადაც პროგრამის ექსპერტები ადგილობრივ საზოგადოებასთან სასამართლოს ჩართულობის ხელშემწყობი სტრატეგიებისა და პრაქტიკული ინიციატივების იდენტიფიცირების გზით სასამართლოს საკუთარი ჩართულობის სტრატეგიისა და სამოქმედო გეგმის შემუშავებაში დაეხმარებიან.