იაკობ გოგებაშვილის სახელობის თელავის სახელმწიფო უნივერსიტეტის (TESAU) იურიდიული კლინიკის მოდერნიზაციისთვის USAID სამართლის უზენაესობის პროგრამის მუდმივი მხარდაჭერის ფარგლებში, პრაქტიკული სამართლის (Street Law) ექსპერტმა, პროფესორმა რიჩარდ გრაიმსმა, უნივერსიტეტის ბიზნესის, სოციალურ მეცნიერებათა და იურიდიული ფაკულტეტის მე-3 და მე-4 კურსის სტუდენტებსა და პროფესორებს თელავში ჩაუტარა 2 დღიანი სემინარი.

Street Law პროგრამა არის მიდგომა, რომელიც პრაქტიკულ სამართლებრივ ცოდნას აწვდის სხვადასხვა თემს ტრადიციული სამართლებრივი წყობის მიღმა. ის აძლიერებს იმ ინდივიდებს, რომლებიც სამართლებრივი საკითხებისა და თავიანთი უფლებების შესახებ მწირე ინფორმაციას ფლობენ და სემინარებისა და დისკუსიების საშუალებით, რომელთაც გადამზადებული სამართლის სკოლის სტუდენტები უძღვებიან, ცნობიერებას უმაღლებას.

სემინარის დროს პროფესორმა გრაიმსმა Street Law-ს კონცეფცია განმარტა და ახსნა თუ როგორი უნდა იყოს სწავლების მეთოდოლოგია Street Law-ს ფარგლებში ჩატარებულ გაკვეთილებზე. სემინარის ორივე დღეს აქტიურად ესწრებოდა 25 მონაწილე, რომლებიც პროფესორმა გრაიმსა სამ ჯგუფად დაჰყო და ჯგუფური სავარჯიშოს სახით დაავალა Street Law-ს გაკვეთილის სიმულირება, დაწყებული თემის არჩევიდან, დამთავრებული იურიდიული კვლევის ჩატარებით, ინტერაქტიული პრეზენტაციის მომზადებითა და გაკვეთილისთვის არჩეული საკითხის აუდიტორიისთვის წარდგენით. პროფესორმა გრაიმსმა ჯგუფებს პროცესის თითოეული საფეხური დეტალურად აუხსნა, ხოლო TESAU-ს პროფესორებთან ცალკე სესია გამართა, სადაც განსაზღვრეს კურსის მიზნები და განიხილეს სტუდენტების შეფასების მექანიზმები.

TESAU-ს მიმდინარე საგრანტო მხარდაჭერის ფარგლებში, Street Law-ს მიმართულება სავალდებულო იურიდიული კლინიკის კურსის ნაწილად დაემატა, რომელიც მოიცავს გაკვეთილების ჩატარებას კახეთის რეგიონის საშუალო საფეხურზე მყოფი სკოლის მოსწავლეებისთვის და საინფორმაციო სესიების გამართვას სხვადასხვა სამიზნე ჯგუფებისთვის, მათ შორის ეთნიკური უმცირესობებისა და ბიზნეს სექტორის წარმომადგენლებისთვის.