32 ქართველ მედიატორს,  USAID სამართლის უზენაესობის პროგრამისა და საქართველოს მედიატორთა ასოციაციის მხარდაჭერით, შესაძლებლობა ჰქონდა, მედიაციაში სხვადასხვა მოლაპარაკების სტილისა და ქუოჩინგთან დაკავშირებულ მიდგომებზე მეტი ინფორმაცია დოქტორი გრეგ ბონდისგან მიეღოთ. 

დოქტორი ბონდი არის მედიატორი, მოდერატორი და ტრენერი, ასევე გამოყენებით მეცნიერებათა ტექნიკური უნივერსიტეტის ლექტორი (ვილდაუ, გერმანია). მას მრავალმხრივი საერთაშორისო გამოცდილება აქვს. იგი მუშაობდა ჩინეთში, ამერიკის შეერთებულ შტატებში, ევროკავშირის ქვეყნებსა და საქართველოში. 

USAID სამართლის უზენაესობის პროგრამამ ისარგებლა დოქტორი ბონდის საქართველოში ყოფნით და მას პრაქტიკოსი მედიატორებისთვის პროფესიული განვითარების ტრენინგის ჩატარება სთხოვა. ეს ასევე ეხმიანობოდა საქართველოს მედიატორთა ასოციაციის სურვილს, რომ მედიატორებს განგრძობადი შესაძლებლობები ჰქონდეთ იმისთვის, რომ ისწავლონ ახალი მიდგომები, მეთოდები, შეიძინონ ახალი უნარები და ჰქონდეთ საშუალება, ისწავლონ ერთმანეთისგან.

დოქტორმა ბონდმა ისაუბრა დისტრიბუციული და ინტეგრაციული მოლაპარაკების შესახებ მედიაციაში, მან ასევე გაუზიარა მონაწილეებს ქოუჩინგის პრაქტიკა. მონაწილეებს პრაქტიკული დავალებების გზით, საშუალება ჰქონდათ ენახათ, თუ როგორ მუშაობს ეს მიდგომები პრაქტიკაში და ემსჯელათ მათ დადებით მხარეებსა და რისკებზე, ასევე გამოეყენებინათ შეთავაზებული მეთოდი, რათა კონკრეტული კაზუსის საშუალებით ერთმანეთისთვის ქოუჩინგი გაეწიათ. 

„მედიაციის არსი მოლაპარაკების პროცესის ტემპის შენელებაა, რათა უპირველესად, მოხდეს მხარეთა ინტერესებისა და საჭიროებების გამოკვლევა და შემდგომ, მათი ანალიზის საფუძველზე, მხარეებისთვის ამ ინფორმაციის უკუ-მიწოდება მედიატორების მიერ. მედიატორებს სჭირდებათ გაიგონ, თუ რა არის მნიშვნელოვანი მხარეებისთვის“, განაცხადა დოქტორმა ბონდმა მედიატორთა ტრენინგისას.

ერთ-ერთმა მონაწილემ, მედიატორმა და ადვოკატმა ხათუნა ბესელიამ განაცხადა: „ტრენინგმა საშუალება მომცა სხვა კუთხიდან დამენახა, თუ რამდენად დიდი პასუხისმგებლობა მეკისრება, როცა კონკრეტულ საქმეზე ვმუშაობ. მე მნიშვნელოვანი რჩევები მივიღე იმ მიდგომების შესახებ, რაც ჩემს პრაქტიკას უფრო ეფექტიანსა და წარმატებულს გახდის. სიმულაციის სავარჯიშო განსაკუთრებით ინფორმატიული იყო, განსაკუთრებით მედიატორის როლის გააზრების თვალსაზრისით. ჩვენ ასევე მივიღეთ რჩევები კონკრეტული საქმეების გაანალიზების პროცესის შესახებ, რაც დაგვეხმარება იმაში, რომ ერთმანეთს გავუზიაროთ გამოცდილებები მომავალში“.