დასრულდა USAID სამართლის უზენაესობის პროგრამის მიერ მხარდაჭერილი ვაქციოთ კანონი ყველასათვის ხელმისაწვდომი: პარალეგალების ინიციატივა და კარიერული საუბრები. 

ერთი კვირის განმავლობაში იურიდიული დახმარების სამსახურის კონსულტანტებს ყველა ბიუროდან ჰქონდათ შესაძლებლობა მოქმედ მოსამართლეებთან და დარგის სპეციალისტებთან, პროფესიონალებთან ერთად ემსჯელათ ადამიანის უფლებების ისეთ საკითხებზე, როგორიცაა ქალთა უფლებები და ადამიანებით ვაჭრობა (ტრეფიკინგი) და მიეღოთ ინფორმაცია არსებული სამართლებრივი პრაქტიკის შესახებ. ამის პარალელურად ჩატარდა ტრენინგი თორმეტი პარალეგალი სტუდენტისთვის აჭარის რეგიონიდან. 

სტუდენტების შერჩევა მოხდა ღია კონკურსის წესით. მათ მიიღეს ინფორმაცია ქალთა უფლებების და ადამიანებით ვაჭრობის (ტრეფიკინგის) შესახებ და ასევე ჰქონდათ შესაძლებლობა დასწრებოდნენ კარიერულ საკითხებზე საუბრებს მოსამართლეების, სახალხო დამცველის, პრაქტიკოსი იურისტების, სამოქალაქო საზოგადოების წარმომადგენლების მონაწილეობით ისეთ საკითხებზე როგორიცაა იურიდიულ პროფესიაში შესვლის კრიტერიუმები და მოთხოვნები, იურიდიულ სფეროში წარმატებული პროფესიონალისთვის საჭირო უნარები, პროფესიის წინაშე არსებული გამოწვევები და განგრძობადი იურიდიული განათლების საჭიროება და მნიშვნელობა. 

საინფორმაციო პროექტის მეორე ეტაპი დაიწყება სექტემბერში, როდესაც პარალეგალი სტუდენტები და იურიდიული დახმარების სამსახურის ადვოკატები ჩავლენ მაღალმთიან აჭარაში ადგილობრივ მოსახლეობასთან შესახვედრად და მათ უფლებებზე სასაუბროდ და ასევე გაუზიარებენ ინფორმაციას იურიდიული დახმარების სამსახურის უფასო სერვისებზე. 

იურიდიული დახმარების სამსახურის ადვოკატებს და კონსულტანტებს ყოველდღიური ურთიერთობა აქვთ ადგილობრივი თემის წარმომადგენლებთან საქართველოს ყველა რეგიონში და აქტიურად ცდილობენ საზოგადოების სამართლებრივი პრობლემების მოგვარებას უფასო იურიდიული რჩევის და საადვოკატო მომსახურებით. 

„მოხარული ვარ, რომ ჩვენ სტუდენტმა პარალეგალებმა გავიარეთ USAID-ის სამართლის უზენაესობის პროგრამის მიერ შემოთავაზებული სასწავლო კურსი და მოუთმენლად ველით შეხვედრებს აჭარის მოსახლეობასთან და მათთან ადამიანის უფლებებზე საუბარს. ჩვენ მნიშვნელოვანი ცოდნა მივიღეთ და აჭარის სოფლებში იურიდიული დახმარების სამსახურის ადვოკატებთან ერთად დაგეგმილი შეხვედრები ჩვენ სტუდენტებს დაგვეხმარება სამომავლოდ პროფესიულ განვითარებაში“, ამბობს სალომე ქოქოსაშვილი, სტუდენტი. ის ასევე აღნიშნავს: „თანამედროვე მსოფლიოში, ქალთა უფლებების შეზღუდვა და ადამიანებით ვაჭრობა (ტრეფიკინგი) მწვავე საკითხია. სწორედ ამიტომ მნიშვნელოვანია ყველამ იცოდეს საკუთარი უფლება, რათა უკეთ დაიცვან მათი და მათთვის ძვირფასი ადამიანების უფლებები“. 

წამყვან სპიკერებს შორის იყვნენ იურიდიული დამხარების სამსახურის ხელმძღვანელი რაჟდენ კუპრაშვილი, USAID სამართლის უზენაესობის პროგრამის მენეჯერი რუსუდან ტაბატაძე და USAID სამართლის უზენაესობის პროგრამის ხელმძღვანელი გიორგი ჩხეიძე.

ტრენერები იყვნენ: თბილისის სააპელაციო სასამართლოს მოსამართლეები დიანა ბერეკაშვილი, თამარ ალანია და თამარ ონიანი; პროფესორი მარინე მესხი; საქართველოს სახალხო დამცველი ნინო ლომჯარია; საქართველოს ადვოკატთა ასოციაციის თავმჯდომარე დავით ასათიანი, საქართველოს ადვოკატთა ასოციაციის აღმასრულებელი დირექტორი გიორგი ჭეხანი, ორგანიზაცია საორსას დამფუძნებელი ლია ფუტკარაძე.