USAID სამართლის უზენაესობის პროგრამამ მხარი დაუჭირა მედიაციის ტრენინგის ჩატარებას სახალხო დამცველის აპარატის თანამშრომლებისთვის, აპარატის ინსტიტუციური გაძლიერების მიზნით.

ტრენინგს თანასწორობის დეპარტამენტის თანამშრომლებთან ერთად, ესწრებოდნენ გენდერული დეპარტამენტის, ბავშვთა უფლებების დეპარტამენტისა და შეზღუდული შესაძლებლობების მქონე პირთა უფლებების დაცვის დეპარტამენტის წარმომადგენლები.

თანასწორობის დეპარტამენტი მნიშვნელოვან როლს ასრულებს დისკრიმინაციის წინააღმდეგ ბრძოლაში, რასაც დისკრიმინაციის ყველა ფორმის აღმოფხვრის შესახებ საქართველოს კანონი ითვალისწინებს. დეპარტამენტი შეისწავლის თანასწორობის დარღვევასთან დაკავშირებულ განცხადებებს ან საჩივრებს და საჭიროების შემთხვევაში უფლებამოსილია ჩაატაროს მედიაცია.

ტრენინგი ექსპერტმა და საქართველოს მედიატორთა ასოციაციის (MAG) წევრმა ვეკო დოდაშვილმა ჩაატარა.

ორდღიანი ტრენინგი 18-19 ივნისს ჩატარდა და ძირითადად პრაქტიკულ ასპექტებს მოიცავდა. ტრენერმა საქართველოში მედიაციის უახლესი პრაქტიკა და მორიგების გზით წარმატებულად დასრულებული საქმეები განიხილა. ტრენინგი ასევე მოიცავდა სხვადასხვა საკითხებს, როგორიცაა მედიაციის პრინციპები და ტექნიკა, ეფექტური კომუნიკაციის უნარები, კონფლიქტების და მოლაპარაკების მართვა და ურთიერთსასარგებლო შეთანხმებების მიღწევა.

ოცდაორ მონაწილეს ასევე ჰქონდა შესაძლებლობა ჩართულიყვნენ პრაქტიკულ სავარჯიშოებში, რასაც მოჰყვა დისკუსია და მათი უნარების შეფასება.