13-14 აპრილს, USAID სამართლის უზენაესობის პროგრამის ხელშეწყობით გაიმართა სამუშაო შეხვედრა განათლების ხარისხის განვითარების ეროვნულ ცენტრსა (ცენტრი) და უმაღლესი საგანმანათლებლო დაწესებულებების ავტორიზაციის საბჭოს შორის.

ავტორიზაციის საბჭო პასუხისმგებელია ყველა უმაღლესი საგანმანათლებლო დაწესებულების ინსტიტუციურ აკრედიტაციაზე, რომლის წევრებიც ორწლიანი ვადით აირჩევიან, ხოლო ცენტრი მის სამდივნო ფუნქციას ასრულებს. საბჭოს ახალი წევრები თანამდებობაზე 2024 წლის მარტში დაინიშნენ.  

შეხვედრას ესწრებოდა 35 მონაწილე, მათ შორის განათლების, მეცნიერებისა და ახალგაზრდობის მინისტრის პირველი მოადგილე ალექსანდრე წულაძე; ცენტრის დირექტორის მოვალეობის შემსრულებელი ლაშა მარგიშვილი; ავტორიზაციის საბჭოს თავმჯდომარე კახა შენგელია; ასევე საბჭოს სხვა წევრები და ცენტრის თანამშრომლები.

მისასალმებელ სიტყვაში, ლისა კოვაკმა, USAID/საქართველოს დემოკრატიის, მმართველობისა და უფლებების ოფისის დირექტორის მოვალეობის შემსრულებელმა, ხაზი გაუსვა USAID-ის მიმდინარე მხარდაჭერას საგანმანათლებლო სფეროს რეფორმების მიმართულებით ყველა საფეხურზე, დაწყებული დაწყებითი სკოლებით, უნივერსიტეტებითა თუ პროფესიული სექტორით.

შეხვედრაზე ავტორიზაციის საბჭოს ახალი წევრები გაეცნენ ინსტიტუციური აკრედიტაციის არსებულ პროცედურებსა და სტანდარტებს, ასევე საბჭოს წევრების უფლება-მოვალეობებს, ზეპირი მოსმენისა და გადაწყვეტილების გასაჩივრების საკითხებს. ცენტრის თანამშრომლებმა ასევე მიმოიხილეს წინა ავტორიზაციის საბჭოს პრაქტიკა და ის საერთო რეკომენდაციები რომელიც ინსტიტუციური აკრედიტაციის დროს მიეცათ უნივერსიტეტებს.

წელს, 24 უმაღლესი საგანმანათლებლო დაწესებულების ავტორიზაციის პროცესია დაგეგმილი, მათ შორის ძირითადი კერძო და საჯარო უნივერსიტეტების თბილისსა და რეგიონში.