USAID სამართლის უზენაესობის პროგრამის მხარდაჭერით, თბილისის საქალაქო სასამართლოს მოსამართლეები თამარ ხაჟომია, თამარ ლაკერბაია და ირაკლი კოპალიანი სულხან-საბა ორბელიანის უნივერსიტეტის სტუდენტებს შეხვდნენ ქალთა უფლებების სფეროში აქტუალური საკითხების განსახილველად.

შეხვედრა მოსამართლეების თამარ ხაჟომიასა და თამარ ლაკერბაიას ინიციატივით, სამართლის უზენაესობის პროგრამის ქალთა უფლებების პრაქტიკის ჯგუფში ჩართულობის ფარგლებში გაიმართა. მოსამართლეებმა შეკრებილ აუდიტორიას გაუზიარეს ამ მიმართულებით არსებული სასამართლო პრაქტიკა და გამოწვევები საქართველოში ქალთა უფლებების სფეროში.

შეხვედრას 55-ზე მეტი სტუდენტი დაესწრო, რამაც მათ საშუალება მისცა მოსამართლეებისგან გასცნობოდნენ ისეთ საკითხებს, როგორიცაა: ქალთა განათლებისა და პროფესიული განვითარების უფლება, საგანმანათლებლო დაწესებულებებში დისკრიმინაციის შესახებ არსებული სასამართლო პრაქტიკა, განათლების მნიშვნელობა სექსუალური შევიწროების პრევენციაში, რეაგირება სექსუალური შევიწროების დროს და მამაკაცთა როლი ქალთა უფლებების დაცვის ხელშეწყობაში.

შეხვედრის დასაწყისში, საბაუნის რექტორის მოადგილემ და საბაკალავრო პროგრამების დირექტორმა, დიმიტრი გეგენავამ USAID სამართლის უზენაესობის პროგრამის ხელმძღვანელ, გიორგი ჩხეიძესთან ერთად სტუდენტებს მიმართა.

დიმიტრი გეგენავამ ხაზი გაუსვა ამ ტიპის დისკუსიების მნიშვნელობას, რამდენადაც ეს ეხმარება ახალგაზრდა იურისტებს, შეიძინონ ახალი ცოდნა და უნარები, რაც იურიდიული კარიერის საწყის ეტაპზე განსაკუთრებულად გამოადგებათ. მან მზადყოფნა გამოხატა მომავალშიც ითანამშრომლოს USAID პროგრამასთან მსგავსი ინიციატივების განსახორციელებლად.

„ქვეყანამ უკვე ბევრს მიაღწია სამართლის უზენაესობის მიმართულებით, თუმცა წინ კიდევ დიდი გზა გვაქვს, რომელიც გამოწვევებითაა სავსე. ხუთი წლის მანძილზე, სამართლის უზენაესობის პროგრამა, USAID-ის ფინანსური მხარდაჭერით, უმაღლეს საგანმანათლებლო დაწესებულებებს მხარს დაუჭერს იურიდიული განათლების ხარისხის გაუმჯობესებისა და კარიერული განვითარების ხელშემწყობი უნარების დახვეწის მიზნით“ - თქვა გიორგი ჩხეიძემ სტუდენტებთან საუბრისას, „ჩვენი პროგრამისთვის მნიშვნელოვანია მხარი დავუჭიროთ და გავაძლიეროთ სასამართლო სისტემა და ინდივიდუალური მოსამართლეები. სხვა, ტრადიციული ტიპის მხარდაჭერასთან ერთად, ჩვენ გადავწყვიტეთ შევქმნათ პლატფორმები, მოსამართლეთა პრაქტიკის ჯგუფების სახით, რომელთა წარმომადგენლები (თამარ ლაკერბაია და თამარ ხაჟონია) დღეს აქ არიან. ჩვენ გვჯერა, რომ ეს ჯგუფები კარგი საშუალებაა პროგრამა დაეხმაროს მოსამართლეებს და ზოგადად, იურიდიულ სექტორს, მათ შორის პრაქტიკოს იურისტებსა და სტუდენტებს“, დასძინა მან.

დისკუსია თითქმის სამ საათს გაგრძელდა, რამაც საშუალება მისცა სტუდენტებს მეტი გაეგოთ უახლესი ანტიდისკრიმინაციული კანონმდებლობის შესახებ, განეხილათ მიმდინარე გამოწვევები და სასამართლო პრაქტიკა ოჯახური ძალადობის გარშემო, ასევე გაეზიარებინათ საკუთარი რეალური გამოცდილებები და მიეღოთ კვალიფიციური პასუხები და რჩევები მოსამართლეებისაგან.