დღეს გორის სახელმწიფო უნივერსიტეტში გაიმართა - ადამიანის უფლებების სამართლის საუნივერსიტეტო კვირეულის გახსნა, რომელიც საქართველოს 15 უნივერსიტეტის სამართლის სკოლას აერთიანებს. კვირეულის დღის წესრიგი ეხმიანება ადამიანის ადამიანის უფლებათა გლობალური კამპანიის მთავარ გზავნილს - ღირსება, თავისუფლება და სამართლიანობა ყველასათვის! - რომლის ფარგლებშიც 30-მდე საჯარო დისკუსია და შეხვედრაა დაგეგმილი. კვირეული ტარდება USAID სამართლის უზენაესობის პროგრამის მხარდაჭერით და თბილისის თავისუფალი უნივერსიტეტის ორგანიზებით.

გახსნის ღონისძიების შემდეგ გაიმართება პანელური დისკუსია თემაზე - რუსეთ-უკრაინის ომი და ადამიანის უფლებები.

კვირეულის დასასრულს, ადამიანის უფლებების დაცვის საერთაშორისო დღეს [10 დეკემბერი], საუნივერსიტეტო კვირეულში მონაწილე უნივერსიტეტები ტრადიციულად გამოავლენენ და დააჯილდოვებენ 2 კანდიდატს, ადამიანის უფლებების დაცვასა და ადამიანის უფლებების სამართლის მეცნიერების განვითარებაში შეტანილი განსაკუთრებული წვლილისთვის.

ადამიანის უფლებების სამართლის საუნივერსიტეტო კვირეული ყოველწლიური ღონისძიებაა, რომლის მიზანი სტუდენტებსა და ახალგაზრდებში ადამიანის უფლებების პრობლემური საკითხების შესახებ ცოდნის გავრცელება და უნივერსიტეტების თანამშრომლობის გზით ადამიანის უფლებების სამართლის შესახებ იდეათა და მოსაზრებათა აქტიური ურთიერთგაცვლაა.

მონაწილე უნივერსიტეტებს სჯერათ, რომ ერთობლივი ძალისხმევით შესაძლებელია ადამიანის უფლებათა პრობლემური საკითხების შესახებ ფართო საზოგადოებრივი დისკუსია და ქართულ საზოგადოებაში ადამიანის ღირსების, თავისუფლების და კანონის წინაშე თანასწორობის განმტკიცება.

„ადამიანის უფლებათა საუნივერსიტეტო კვირეული 2014 წლიდან ტარდება და USAID მისი განუხრელი მხარდამჭერია. ჩვენ მიგვაჩნია, რომ საუნივერსიტეტო გარემოში აკადემიური კვლევისა და დისკუსიის გაძლიერება ხელს უწყობს ადამიანის უფლებათა ამა თუ იმ პრობლემურ საკითხზე საზოგადოების ცნობიერების ამაღლებას და სწორი ღირებულებების დამკვიდრებას.“ - გიორგი ჩხეიძე, USAID სამართლის უზენაესობის პროგრამის ხელმძღვანელი.

2022 წლის ადამიანის უფლებების სამართლის საუნივერსიტეტო კვირეულის პროგრამა შეგიძლიათ იხილოთ აქ.