არასამთავრობო ორგანიზაციების პრევენცია პროგრესისთვის და სამოქალაქო ჩართულობისა და აქტივიზმის ცენტრის ორგანიზებით, 2023 წლის 17 დეკემბერს მართლმსაჯულების ხელმისაწვდომობის საკითხებზე მსჯელობის მიზნით, მარნეულში ადვოკატებთან შეხვედრა გაიმართა.

კერძო სექტორის, იურიდიული დახმარების სამსახურისა და სამოქალაქო საზოგადოების იურისტებმა საქმის განხილვის დროს უზრუნველყოფილი თარგმანის ხარისხის პრობლემასა და სასამართლოში საქმის განხილვის ვადების გაჭიანურებაზე ისაუბრეს. ასევე აღინიშნა, რომ  სამოქალაქო და ადმინისტრაციული სამართლის სპეციალიზაციის მქონე მოსამართლეები აღკვეთის ღონისძიების განხილვისას უფრო მკაცრ მიდგომებს იყენებენ, ვიდრე ის მოსამართლეები, რომლებიც სპეციალიზირებულნი არიან სისხლის სამართალში.

მონაწილეებმა ასევე ისაუბრეს ადრეული ქორწინების საქმეებზე რეაგირებისას სამართალდამცავი ორგანოების არაეფექტიანობაზე და აღნიშნეს, რომ აუცილებელია ე.წ. “ნიშნობის” (ოჯახებს შორის შეთანხმება ბავშვთა ქორწინებაზე) კრიმინალიზაცია ბავშვთა უფლებების დასაცავად. ადვოკატებმა ხაზი გაუსვეს მედიაციის, როგორც დავის გადაწყვეტის ალტერნატიული გზის მნიშვნელობას და აღნიშნეს, რომ მედიაციის შესახებ ქვემო ქართლის მოსახლეობის ინფორმირებულობის ხარისხი დაბალია.

შეხვედრა USAID სამართლის უზენაესობის პროგრამის მხარდაჭერით გაიმართა პროექტის ფარგლებში, რომლის მიზანია მარნეულისა და ბოლნისის მუნიციპალიტეტებში მცხოვრები ეთნიკური უმცირესობების წარმომადგენელთა მართლმსაჯულების ხელმისაწვდომობის გაზრდა.