USAID სამართლის უზენაესობის პროგრამა მხარს უჭერს საქართველოს ახალგაზრდა იურისტთა ასოციაციის (საია) საქმიანობას, რომელიც მიზნად ისახავს საბჭოთა პერიოდის ადმინისტრაციულ სამართალდარღვევათა კოდექსის რეფორმას.

2023 წლის 21 ივნისს საიას ორგანიზებით გაიმართა ფორუმი თემაზე „მართლმსაჯულება 1984 წლის კოდექსით“.

ფორუმს 24 მონაწილე ესწრებოდა, მათ შორის მედიის, აკადემიის, საერთაშორისო და ადგილობრივი ორგანიზაციების წარმომდგენლები. მისასალმებელ სიტყვაში რუსუდან ტაბატაძემ, USAID კავკასიის დემოკრატიისა და მმართველობის ოფისის კანონის უზენაესობის პროექტის მენეჯერმა, ხაზი გაუსვა სამოქალაქო საზოგადოების როლს რეფორმების ადვოკატირების პროცესში: „როდესაც ხელისუფლების მხრიდან ფუნდამენტური რეფორმების განხორცილების ნება ნაკლებია, ძალიან მნიშვნელოვანია, სამოქალაქო სექტორი იყოს აქტიური და საზოგადოებას მიაწოდოს ინფორმაცია არსებული პრობლემების შესახებ“.

საიამ ფორუმის მონაწილეებს მიაწოდა ინფორმაცია კანონმდებლობისა და სასამართლო პრაქტიკის ხარვეზების შესახებ. ასევე, ორგანიზაციის წარმომადგენლებმა ისაუბრეს არსებული გამოწვევებისა და ახალი ტენდენციების შესახებ. მაგალითად, სასამართლომ ინტერნეტში გამოთქმული მოსაზრება ადმინისტრაციულ სამართალდარღვევად მიიჩნია.

სახალხო დამცველის აპარატის სისხლის სამართლის მართლმსაჯულების დეპარტამენტის უფროსმა გვანცა ჩხაიძემ ადმინისტრაციულ სამართალდარღვევათა კოდექსი აპარატის პერსპექტივიდან შეაფასა:

„წლების განმავლობაში სახალხო დამცველის მთავარი რეკომენდაცია იყო კოდექსის შეცვლა. კანონმდებლობაც და პრაქტიკაც ხარვეზიანია. ისეთი საკითხები, როგორიცაა უდანაშაულობის პრეზუმფცია და მტკიცების ტვირთი, კანონში არ არის გათვალისწინებული“, - აღნიშნა გვანცა ჩხაიძემ.

პროექტის ფარგლებში საია თანამშრომლობდა მედია ორგანიზაცია ნეტგაზეთთან. ნეტგაზეთის ჟურნალისტი დაესწრო სასამართლო პროცესებს ადინისტრაციულ საქმეებზე და მოამზადა ოთხი სტატია ადმინისტრაციულ სამართალწარმოებასთან დაკავშირებულ პრობლემებზე. ფორუმზე ნეტგაზეთის ჟურნალისტმა გივი ავალიანმა დამსწრე საზოგადოებას თავისი დაკვირვებები გაუზიარა.

მოხსენებების შემდეგ ფორუმის მონაწილეებმა განეხილეს ადმინისტრაციულ სამართალდარღვევათა საქმეებში პოლიციისა და სასამართლოების პრაქტიკასთან დაკავშირებული საკითხები, როგორიცაა ადვოკატთა საქმიანობაში ხელის შეშლა (განსაკუთრებით მასობრივი დაპატიმრებების დროს), მოქალაქეებისთვის მტკიცების ტვირთის დაკისრება, ადმინისტრაციული დაკავების ვადები, პირის დაკავების კანონიერების დადგენის პრობლემა და ლოჯისტიკური საკითხები.