2024 წლის 29 მარტს, USAID სამართლის უზენაესობის პროგრამამ, სამცხე-ჯავახეთის სახელმწიფო უნივერსიტეტთან თანამშრომლობითა და თბილისის სააპელაციო სასამართლოს მოსამართლის ქეთევან მესხიშვილის მონაწილეობით ქალთა შრომით უფლებებზე კარიერული საუბარი მოაწყო. ღონისძიება ქალთა ისტორიის თვის ფარგლებში გაიმართა.

შეხვედრას სამცხე-ჯავახეთის სახელმწიფო უნივერსიტეტის იურიდიული და საჯარო მმართველობის ფაკულტეტების 50-მდე სტუდენტი დაესწრო. მონაწილეებს მისალმების შემდეგ შესავალი სიტყვით მიმართა სამცხე-ჯავახეთის სახელმწიფო უნივერსიტეტის რექტორმა მაკა ბერიძემ, მანვე გაუწია მოდერატორობა შეხვედრის შემდგომ დისკუსიას. რექტორმა ხაზი გაუსვა სტუდენტების დარგის წამყვან ექსპერტებთან შეხვედრის მნიშვნელობას, რომლის მეშვეობითაც ახალგაზრდებს საშუალება აქვთ მიიღონ პროფესიული ზრდისთვის საჭირო რჩევები.

შეხვედრის დასაწყისში მოსამართლე მესხიშვილმა სტუდენტებთან შეხვედრის შესაძლებლობისთვის მადლიერება გამოხატა და გამოთქვა მომავალი თაობისთვის ცოდნისა და გამოცდილების მზადყოფნისთვის მუდმივი გაზიარების მზაობა ქეთევან მესხიშვილის გადმოცემით, იგი მოსამართლე 28 წლის ასაკში გახდა და 14 წლის განმავლობაში ასრულებს სასამართლო მოვალეობას. შეხვედრაზე სააპელაციო სასამართლოს მოსამართლემ შრომის ბაზარზე გენდერული დისკრიმინაციის საკითხები განიხილა და მონაწილეებს იმ ოჯახური, სოციალური და გარემო პირობების შესახებ უამბო, რომელიც ქალის პროფესიულ განვითარებას უშლის ხელს, ასევე მოსამართლემ სტუდენტებს ურჩია, ყოველდღიურად მინიმუმ 15 წუთი დაუთმონ პროფესიულ ზრდას და 5-15 წელიწადში ისინი საკუთარი პროფესიონალიზმის მკვეთრი ზრდის მოწმენი გახდებიან.

დისკუსიის ნაწილში სტუდენტების კითხვები ქალისთვის პროფესიულ ზრდაში უხილავ ბარიერებს, წარმატების მიღწევის სტრატეგიებს, მოსამართლის ცხოვრებაში დაშვებულ შეცდომებს ეხებოდა, ასევე ახალგაზრდებმა ითხოვეს რჩევები პროფესიულ განვითარებასთან დაკავშირებით. მოსამართლე მესხიშვილმა მათ შეკითხვებს უპასუხა და ხაზი გაუსვა წარმატების მიღწევისთვის თვითგანვითარებაზე მუდმივი მუშაობისა და სხვების მოსაზრებების პატივისცემის მნიშვნელობას.