ამერიკელი მოსამართლეები თელავში ადგილობრივ ადვოკატებს შეხვდნენ
2024 წლის 12 ივლისს, თელავის იურიდიული დახმარების სამსახურის ბიუროს (LAS) და საქართველოს ადვოკატთა ასოციაციის (GBA) ჩვიდმეტი რეგიონული ადვოკატი მოსამართლეებს ელენ და დუგლას ფეარებს შეხვდა - ამერიკელ მოსამართლეებს ვაშინგტონის შტატიდან, რომლებიც USAID სამართლის უზენაესობის პროგრამის მოსამართლეთა გაცვლით აქტივობებში მონაწილეობენ. შეხვედრის მთავარი მიზანი ბავშვზე ორიენტირებული პრაქტიკის შესახებ ინფორმაციის გაცვლა იყო.
მოსამართლე ელენ ფეარმა, რომელმაც 23 წელზე მეტი გაატარა აშშ-ს შტატის სასამართლოს მოსამართლედ, შეხვედრაზე დამსწრეებს თავისი პროფესიული გამოცდილება და შეხედულებები გაუზიარა ბავშვის უფლებებთან დაკავშირებულ საკითხებზე, როგორიცაა განქორწინებისას ბავშვის აღზრდის პროცესის დაგეგმარება, ბავშვის საჭიროებების დადგენა და ბავშვის საუკეთესო ინტერესის პრინციპით მოქმედება. ქართველ ადვოკატებს მან ასევე გაუზიარა ინფორმაცია იმის შესახებ, თუ როგორ განიხილება მეურვეობის საქმეები ვაშინგტონის შტატში და რა არის დადგენილი ვადები, რომლებიც გაწერილია ბავშვის აღზრდისათვის საჭირო სამოქმედო გეგმაში. დამსწრეებს, ასევე ესაუბრა სასამართლოს მიერ დანიშნული წარმომადგენლობის ორ ინსტიტუტზე და მათ განსხვავებაზე - “guardian ad litem”-სა და „CASA”-ზე (Court Appointed Special Advocate). მოსამართლის განმარტებით, „guardian ad litem” არის პირი, რომელიც დანიშნულია სასამართლოს მიერ, რათა იყოს ბავშვის კანონიერი წარმომადგენელი სასამართლოში და გადაწყვეტილება მიიღოს ბავშვის საუკეთესო ინტერესიდან გამომდინარე, რის დროსაც ის შესაბამის ანაზღაურებასაც იღებს, ხოლო „CASA” არის სპეციალური ცოდნის მქონე მოხალისე, რომელიც დანიშნულია ძალადობისა ან უგულებელყოფის საქმეებზე ბავშვის წარმომადგენლად.
მოსამართლე დუგლას ფეარმა, რომელსაც 18 წლიანი მოსამართლეობის გამოცდილება აქვს, ქართველ ადვოკატებს საკუთარ გამოცდილებაზე დაყრდნობით, გაუზიარა ინფორმაცია მედიაციისა და დისტანციური მოსმენების შესახებ. მან ასევე განმარტა, თუ რამ გამოიწვია მედიაციის პოპულარიზაცია აშშ-სა და ევროკავშირში, როგორც დავების გადაწყვეტის ალტერნატიული საშუალებების ერთ-ერთი წამყვანი დარგი.
შეხვედრა ქართველი ადვოკატების მიერ საკუთარი საქმეების, მათი შედეგებისა და სესიაზე მოსმენილი ინფორმაციის ერთმანეთთან შედარებით დაასრულეს.
