USAID სამართლის უზენაესობის პროგრამის მიერ მოწვეულმა ამერიკელმა მოსამართლემ ჯეიმს რედვაინმა სამუშაო შეხვედრა გამართა აჭარის რეგიონში მოღვაწე ადვოკატებთან. 

შეხვედრის მთავარი თემა იყო მოსამართლე რედვაინის მიერ სასამართლო პროცესებზე დაკვირვების შედეგად იდენტიფიცირებული სისტემური პრობლემები, როგორიცაა ბოლო წუთის შუამდგომლობები საქმის გადადების შესახებ, აგრეთვე სასამართლო უწყებების და გზავნილების ჩაბარების პროცედურული საკითხები. 

"შეხვედრა იყო ძალიან ნაყოფიერი და სასიამოვნო." – თქვა მოსამართლე რედვაინმა. „თუმცა, რაც შეეხება სხდომების გადადების, აგრეთვე სასამართლო უწყებებისა და გზავნილების ჩაბარების პრობლემას, მე გულწრფელად ვაფასებ აჭარაში მოღვაწე ადვოკატების მკაფიო პოზიციებს, რომლებიც შეხვედრის განმავლობაში გამოითქვა და აგრეთვე მათ კონსტრუქციულ დამოკიდებულებას, რომ ამ მნიშვნელოვანი საკითხების გადასაწყვეტად ისინი მხარს დაუჭერენ მოსამართლეებს ახალი პროცედურების ინიცირების შემთხვევაში. რა თქმა უნდა, ეს ორი საკითხი არ შეამსუბუქებს ისეთ სასიცოცხლოდ მნიშვნელოვან საჭიროებებს, როგორიცაა დამატებითი მოსამართლეების დანიშვნა და დამხმარე კადრების დამატება. გრძელვადიანი პრობლემები და სხვა საკითხები უნდა გადაწყდეს, მაგრამ სასამართლოს და ადვოკატთა ასოციაციას შეუძლია სასამართლოს გადატვირთვა მყისიერად შეამციროს და გაზარდოს სასამართლოს ხელმისაწვდომობა იმგვარი პროცედურების შემუშავებით, რაც უზრუნველყოფს პროცესის მხარეებისთვის სათანდო უწყებების და გადაწყვეტილებების ჩაბარებას, რომლებიც აპელაციაში არ შეიცვლება. ადვოკატთა ასოციაციის პატივცემული წევრები მხარს უჭერენ მოსამართლეების ძალისხმევას აღასრულონ მართლმსაჯულება. ადვოკატები და მოსამართლეები ერთად შეძლებენ სამართლიანობის იმ იდეალების წინ წაწევას, რომელთაც თითოეული ჩვენგანი ვემსახურებით“. - დაამატა მან. 

USAID სამართლის უზენაესობის პროგრამის რეგიონული ჰაბის იურისტმა, ირინა ხახუტაიშვილმა აღნიშნა: „ჩვენ გვჯერა, რომ იურისტის პროფესიის გაძლიერება მნიშვნელოვანია საქართველოში კანონის უზენაესობის დამკვიდრებისთვის. ქართველ მოსამართლეებსა და ადვოკატებს შორის თანამშრომლობა კიდევ უფრო ხელს შეუწყობს სასამართლოს დამოუკიდებლობას და მართლმსაჯულებაზე მოქალაქეთა ხელმისაწვდომობას. სასამართლო სისტემის ფუნქციონირების გასაუმჯობესებლად, ჩვენ მხარს ვუჭერთ კონსტრუქციულ დიალოგს სამართალწარმოების მთავარ ‘აქტორებს’ შორის (ე.წ Bench Bar ფორმატის საშუალებით)“.

მოსამართლე რედვაინმა და ადვოკატებმა ერთხმად აღნიშნეს, რომ სასამართლოში საქმეების განხილვასთან დაკავშირებული ნებისმიერი პროცედურული ცვლილება პირველ რიგში უნდა შეესაბამებოდეს საქართველოს კანონებს, მათ შორის საქართველოს სამოქალაქო საპროცესო კოდექსს და კონსტიტუციას. ქართველი ადვოკატები მიესალმნენ შესაძლებლობას გასცნობოდნენ საქმისწარმოების და სასამართლო ადმინისტრირების ამერიკულ პრაქტიკას. 

შეხვედრის დასასრულს ადვოკატებმა განაცხადეს, რომ მოხარული იქნებიან შეხვდნენ ქართველ მოსამართლეებს (ე.წ Bench Bar ფორმატში) და განიხილონ კონკრეტული სასამართლო პროცედურები, რომლებიც დაკავშირებულია საქმეთა მართვის ხერხებთან, აგრეთვე სასამართლო უწყებების და გზავნილების ჩაბარების საკითხებთან.