ახალი ანგარიშის თანახმად მეტი უნდა გაკეთდეს ქალების ძალადობისგან დასაცავად
2024 წლის 8 ოქტომბერს, ორგანიზაცია უფლებები საქართველომ ანგარიშის ძალადობის მსხვერპლი ქალების დაცვა საქართველოში: სტრატეგიული სამართალწარმოების შედეგები ონლაინ პრეზენტაცია გამართა. დოკუმენტი USAID სამართლის უზენაესობის პროგრამის (პროგრამა) მხარდაჭერით მომზადდა და მოიცავს 2022 წლის ივლისიდან 2024 წლის მაისის ჩათვლით პერიოდს. პრეზენტაციას 50-მდე მონაწილე დაესწრო.
ანგარიშში, რომლის ავტორია ტურკუს უნივერსიტეტის დოქტორანტი და უფლებები საქართველოს მკვლევარი კარლო ნიკოლეიშვილი, ასახულია გენდერული და ოჯახში ძალადობის მსხვერპლი ქალების სამართლებრივი დაცვის უზრუნველსაყოფის კუთხით არსებული პრაქტიკული და საკანონმდებლო გამოწვევები. ანგარიში ყურადღებას ამახვილებს ისეთ საკითხებზე როგორიცაა სამართალდამცავი უწყებების მხრიდან არასათანადო რეაგირება ქალთა მიმართ ძალდობის შეტყობინებებზე და ეფექტური ინტერვენციის ნაკლებობაზე. იდენტიფიცირებულ გამოწვევებს შორისაა ასევე ძალადობის მსხვერპლთა დაზარალებულად დროულად ცნობა. ანგარიშში აგრეთვე საუბარია ადვოკატისთვის საქმის მასალების ასლების მისაწვდომობისა და სასამართლო კვალიფიკაციის ეტაპზე გენდერული შეუწყნარებლობის მოტივის გამოკვეთის პრობლემურობაზე. ანგარიშის თანახმად, იშვიათად ხდება ძალადობის შემსწრე ბავშვებისთვის დაზარალებულის სტატუსის მინიჭება, მიუხედავად იმისა, რომ მათ დაზარალებულად ცნობას არსებითი მნიშვნელობა აქვს როგორც სისხლის სამართლის მართლმსაჯულების ინტერესებისათვის, ასევე მომავალში მათ მიერ ზიანის ანაზღაურების მოსათხოვად. ანგარიში მოიცავს რეკომენდაციებს სახელმწიფო ინსტიტუტების და იურიდიული პროფესიების წარმომადგენლებისათვის გენდერული ნიშნით და ოჯახში ძალადობის წინააღმდეგ ბრძოლაში სათანადო რეაგირების გაუმჯობესების შესახებ.
პრეზენტაციის დასასრულს დისკუსიის დროს მონაწილეები ისეთ საკითხებსაც შეეხნენ, როგორიცაა ქალთა მეორეული ვიქტიმიზაცია, ფემიციდის შემთხვევების გამოძიებისას არსებული გამოწვევები, მსხვერპლთა თავშესაფარში გადაყვანის პრაქტიკული გამოწვევები და სამართალდამცავთა ცნობიერების დაბალი დონე.
ვლადიმერ მკერვალიშვილმა, უფლებები საქართველოს აღმასრულებელმა დირექტორმა და პროგრამის ხელმძღვანელმა გიორგი ჩხეიძემ მისასალმებელი სიტყვით გამოსვლისას ხაზი გაუსვეს ოჯახში ძალადობასთან ბრძოლის მიმართულებით დამატებითი აქტივობების გატარების საჭიროებას.
