2023 წლის 4 ოქტომბერს, ახალციხის რაიონული სასამართლოს მენეჯერმა ნინო ჩიგოგამ ამერიკელ მოსამართლე ტიმოთი ბალანდთან ერთად, გამართა შეხვედრა 30 ახალგაზრდასთან სამცხე-ჯავახეთის რეგიონიდან, რა დროსაც ისაუბრეს საქართველოსა და ამერიკის შეერთებული შტატების სასამართლო სისტემების მუშაობის ძირითად პრინციპებზე და მათ განსხვავებებზე. ქალბატონმა ჩიგოგამ წარმოადგინა საქართველოს სასამართლო სისტემის ყოვლისმომცველი მიმოხილვა და განმარტა ახალციხის რაიონული სასამართლოს სტრუქტურა.

მოსამართლე ბალანდმა დამსწრეებს აშშ-ს სასამართლოების ძირითადი სტრუქტურისა და ფუნქციის მონახაზი გააცნო და მინესოტას სასამართლო სისტემასა და მის ქართულ შესატყვისს შორის შედარებითი ანალიზი გაუზიარა. მან ასევე ხაზი გაუსვა სასამართლოს საქმიანობის მნიშვნელობას ახალგაზრდების ყოველდღიურ ცხოვრებაში და ისაუბრა არასრულწლოვანთა მიერ ჩადენილი სამართალდარღვევების საკითხებზე.

სასამართლოს სისტემების პრეზენტაციის შემდეგ, მოსამართლე ბალანდმა და ქალბატონმა ჩიგოგამ დამსწრეების შეკითხვებს უპასუხეს. ახალციხის სასამართლოდან ღონისძიებას ასევე ესწრებოდა სამი მოსამართლე და  სასამართლოს ოთხი თანამშრომელი.

პრეზენტაცია ჩატარდა ახალციხის რაიონული სასამართლოს, USAID სამართლის  უზენაესობის პროგრამისა და USAID-ის პროგრამა ერთიანობა მრავალფეროვნებაშია თანამშრომლობის ფარგლებში.