USAID სამართლის უზენაესობის პროგრამამ ახალციხეში კანონის უზენაესობის ჰაბი გახსნა, რომელიც სამცხე-ჯავახეთის რეგიონს დაფარავს.

ჰაბის გახსნითი, პირველი ღონისძიება მრგვალი მაგიდის ფორმატში იურიდიული დახმარების სამსახურთან (LAS) თანამშრომლობით გაიმართა. დისკუსიაში ადგილობრივი არასამთავრობო ორგანიზაციების, LAS-ის,  საქართველოს ადვოკატთა ასოციაციის, უნივერსიტეტისა და ახალციხის რაიონული სასამართლოს 30-მდე წარმომადგენელი მონაწილეობდა. ღონისძიებაზე აღინიშნა პროგრამის მიღწევები და ქუთაისსა და ბათუმში LAS-თან წარმატებული თანამშრომლობის მაგალითები. 

LAS-ის დირექტორის მოადგილემ, ლევან გვენეტაძემ და LAS-ის სასწავლო ცენტრის დირექტორმა, მარიამ ბურკაძემ ისაუბრეს ინიციატივაზე - 'გახადე კანონი ყველასათვის ხელმისაწვდომი' და პარალეგალი სტუდენტების მომზადებაზე.

USAID სამართლის უზენაესობის პროგრამის ხელმძღვანელმა, გიორგი ჩხეიძემ და კანონის უზენაესობის რეგიონულმა მრჩეველმა, ირინა ლორთქიფანიძემ მონაწილეებს გაუზიარეს რეგიონული ჰაბების მიერ წლების განმავლობაში განხორციელებული სხვადასხვა აქტივობების მაგალითები. ეს აქტივობები მოიცავდა პანელურ დისკუსიებს, თემატურ საუბრებს სტუდენტებთან, ტრენინგ-სესიებსა და დისკუსიებს პროფესიონალ იურისტებს შორის.

ტიმ ბუნიევაცმა, პროგრამის მრჩეველმა საზოგადოების ჩართულობის საკითხებში, წარმოადგინა პრეზენტაცია, რომელიც მოიცავდა სტრატეგიების მაგალითებს „მართლმსაჯულებაზე ხელმისაწვდომობის გაუმჯობესება ადამიანებზე ორიენტირებული მართლმსაჯულების მეშვეობით“. აღსანიშნავია, რომ შეხვედრაზე ასევე მოხდა ახალციხის ჰაბის იურისტის, გიორგი ხმალაძის წარდგენაც, რომელიც ამჟამად მუშაობს რეგიონში საზოგადოებასთან კავშირების განვითარებაზე.

დისკუსიის დროს მონაწილეებმა გააზიარეს იდეები იმის შესახებ, თუ რა ინიციატივები შეიძლება შეიქმნას მართლმსაჯულების მომსახურების უზრუნველსაყოფად, რომელიც საუკეთესოდ დააკმაყოფილებს საზოგადოების საჭიროებებს. მათ ასევე დააფიქსირეს მოსაზრებები ადამიანის უფლებების ყველაზე აქტუალურ გამოწვევებზე რეგიონში და გამოთქვეს მათ გადასაჭრელად მომავალში თანამშრომლობის იმედი.