USAID სამართლის უზენაესობის პროგრამის მხარდაჭერით ჩატარდა ბავშვთა უფლებების სამართლის უზენაესობის პრაქტიკის ჯგუფის შეხვედრა ლიკანში, რომელშიც ადმინისტრაციული და სამოქალაქო სამართლის თხუთმეტი მოსამართლე შეხვდა საქართველოს ადვოკატთა ასოციაციის, იურიდიული დახმარების სამსახურის, სახელმწიფო ზრუნვის სააგენტოსა და ბავშვთა უფლებების დამცველი არასამთავრობო ორგანიზაციების ამდენივე წარმომადგენელს.

შეხვედრის დასაწყისში თბილისის სააპელაციო სასამართლოს მოსამართლემ, თამარ ონიანმა ისაუბრა საქართველოს კანონმდებლობასა და პრაქტიკაში ბავშვთა სამართლებრივი წარმომადგენლობის გამოწვევებზე.

შეხვედრის მონაწილეებს ამ თემაზე საკუთარი გამოცდილება გაუზიარეს აგრეთვე ორგანიზაციის „პარტნიორობა ადამიანის უფლებებისთვის“ თავმჯდომარე, თამარ გაბოძემ და იურიდიული დახმარების სამსახურის დირექტორის მოადგილემ, ნინო მელაძემ.

ადამიანის უფლებათა ექსპერტებმა შესაბამის საერთაშორისო სტანდარტებზე ისაუბრეს. ექსპერტმა და საქართველოს ადვოკატთა ასოციაციის ეთიკის კომისიის წევრმა, ბესარიონ ბოხაშვილმა წარმოადგინა ევროპის საბჭოს ინსტიტუტების (ადამიანის უფლებათა ევროპული სასამართლო, მინისტრთა კომიტეტი) მიერ შემუშავებული სტანდარტები, ხოლო აშშ-ს სასამართლოებში ბავშვთა წარმომადგენლობის საუკეთესო პრაქტიკა და ეთიკის საკითხები მიმოიხილა ამერიკელმა ექსპერტმა და პენსილვანიის უნივერსიტეტის (კერის სამართლის სკოლა) პროფესორმა კარა რ. ფინკმა.

თბილისის საქალაქო სასამართლოს მოსამართლე მანანა მესხიშვილმა, საქართველოს ადვოკატთა ასოციაციის ეთიკის კომისიის თავმჯდომარემ კონსტანტინე გელაშვილმა, იურიდიული დახმარების სამსახურის იურიდიული დეპარტამენტის უფროსმა შორენა ბოჭორიშვილმა და სახელმწიფო ზრუნვის სააგენტოს იურიდიული უზრუნველყოფის დეპარტამენტის უფროსმა ირმა ალადაშვილმა გამოსვლებში ხაზი გაუსვეს განსხვავებას ადვოკატისა და პროცედურული წარმომადგენლის როლებს შორის. ამ საკითხებზე მსჯელობამ  აჩვენა, რომ საჭიროა მეტი დისკუსია და თანამშრომლობა ერთიანი გაგებისა და სასამართლო პრაქტიკის ჩამოსაყალიბებლად.