ბავშვთა უფლებების დაცვა, მათი მხარდაჭერა და ეროვნული კანონმდებლობის იმპლემენტაციის ხელშეწყობა, განსაკუთრებით მართლმსაჯულების ხელმისაწვდომობის და თანასწორი მოპყრობის მიმართულებით, ჩვენი პროგრამის ერთ-ერთი პრიორიტეტია.

USAID სამართლის უზენაესობის პროგრამის მხარდაჭერით, ბავშვის უფლებათა დაცვის მუდმივმოქმედ საპარლამენტო საბჭოსა და საქართველოს სახალხო დამცველის აპარატის წარმოადგენლებს შორის სამუშაო შეხვედრა გაიმართა.

შეხვედრის მიზანს საბჭოსა და სახალხო დამცველის აპარატის მუშაობის მეთოდოლოგიისა და საქმიანობის ძირითადი მიმართულებების შესახებ ინფორმაციის გაცვლა და სამომავლო თანამშრომლობის დაგეგმვა წარმოადგენდა. 

მონაწილეებმა განიხილეს ბავშვის უფლებების დაცვის კუთხით არსებული ძირითადი გამოწვევები და პრიორიტეტული მიმართულებები, მათ შორის, სახალხო დამცველის მიერ საქართველოში ალტერნატიული ზრუნვის სისტემის ეფექტიანობის, დეინსტიტუციონალიზაციის, ბავშვთა ძალადობისგან დაცვისა და სიღარიბის კუთხით არსებული მდგომარეობის  შესწავლის შედეგები. საუბარი ასევე შეეხო ბავშვის უფლებების დაცვის მიმართულებით არსებულ სისტემური ხასიათის გამოწვევებს და მისი გადაჭრის გზებს. 

საბჭოს წევრებმა და სახალხო დამცველის აპარატის თანამშრომლებმა, ასევე, იმჯელეს სახალხო დამცველის 2021 წლის საპარლამენტო ანგარიში საფუძველზე, პარლამენტის მიერ გაზიარებული და შესაბამისი სახელმწიფო უწყებების მისამართით გაცემული რეკომენდაციების აღსრულების პრაქტიკაზე და ამ მიმართულებით საპარლამენტო ზედამხვედველობის გაძლიერების გზებზე. 

საბჭოს თავმჯდომარე დავით სერგეენკო, საქართველოს სახალხო დამცველის მოვალეობის შემსრულებელი თამარ გვარამაძე  და USAID სამართლის უზენაესობის პროგრამის ხელმძღვანელი გიორგი ჩხეიძე შეთანხმდნენ ბავშვის უფლებათა დაცვის პრიორიტეტული მიმართულებებით ერთობლივ თანამშრომლობაზე.