საქართველოს არბიტრთა ასოციაციამ,  ფორუმს სახელწოდებით - არბიტრაჟი ბიზნესისთვის -  უმასპინძლა, რომელიც USAID სამართლის უზენაესობის პროგრამის მხარდაჭერით გაიმართა.   მას ორმოცდაათი იურისტი და ადგილობრივი ბიზნეს ორგანიზაციების წარმომადგენელი დაესწრო.

მონაწილეებს მისასალმებელი სიტყვით მიმართეს ჯაბა გველებიანმა, საქართველოს არბიტრთა ასოციაციის თავმჯდომარემ და ნილ ვაინსტაინმა, USAID სამართლის უზენაესობის პროგრამის ხელმძღვანელის მოადგილემ.

ფორუმის მსვლელობისას პანელური დისკუსიები გაიმართა, სადაც არბიტრაჟის სფეროში მოღვაწე გამოცდილმა პროფესიონალებმა ბიზნესის წარმატებაში არბიტრაჟის როლის შესახებ იმსჯელეს. პანელზე განიხილეს შემდეგი საკითხები:  არბიტრაჟის უპირატესობები ბიზნეს დავებში, ინსტიტუციური არბიტრაჟის როლი ბიზნეს დავებში და საქართველოს არბიტრთა ასოციაციის ად ჰოკ არბიტრაჟის წესები.

„დღეს მე გესაუბრებით როგორც არა საერთაშორისო განვითარების პროგრამების პროფესიონალი, არამედ იურისტი, რომელიც აშშ-ში 12 წლის განმავლობაში სასამართლოს გზით კომერციული დავების განხილვაში იყო ჩართული. შემიძლია გითხრათ, რომ ჩემს კლიენტებს ყოველთვის ვურჩევდი, რომ დავა არბიტრაჟისა და მედიაციის გზით გადაეწყვიტათ და რომ იმ საქმეთა დიდი უმრავლესობა, რომლებსაც მე ვუძღვებოდი, სასამართლოს გარეშე, ერთ-ერთი ამ მექანიზმის გამოყენებით წყდებოდა“, განაცხადა ნილ ვაინსტაინმა მისასალმებელ სიტყვაში.

„პროცესის მოქნილობა და სისწრაფე, მხარეთა საჭიროების მიხედვით არბიტრთა დანიშვნის შესაძლებლობა, საარბიტრაჟო გადაწყვეტილების საბოლოობა, და საერთაშორისო აღსრულების შესაძლებლობა და კონფიდენციალურობა არბიტრაჟის ძირითად უპირატესობებს წარმოადგენს“, განაცხადა ჯაბა გველებიანმა. მან ასევე აღნიშნა, რომ ფორუმმა უნიკალური საშუალება მისცა ბიზნესის წარმომადგენლებს, რომ მათ მეტი გაეგოთ იმ შესაძლებლობების შესახებ, რასაც არბიტრაჟი დავების უფრო ეფექტურად გადაწყვეტის საქმეში სთავაზობს. მან კმაყოფილება გამოხატა კერძო სექტორის ჩართულობისა და ინტერესის გამო და იმედი გამოთქვა, რომ ერთობლივი ძალისხმევით მოხდება დავის გადაწყვეტის სისტემის გაუმჯობესება საქართველოში.  

მონაწილეთა შეკითხვები შეეხებოდა იმ უპირატესობებსა და რისკებს, რასაც საარბიტრაჟო გადაწყვეტილებების საბოლოობა ქმნის, როგორ მუშაობს უზრუნველყოფის ღონისძიებები არბიტრაჟში, ასევე არჩევანი, რომელიც საჭიროა გაკეთდეს არბიტრთა რაოდენობასთან, გამოსაყენებელ სამართალსა და საარბიტრაჟო წესებთან მიმართებაში.

ფორუმის დახმარებით მონაწილეებს შორის არბიტრაჟის შესახებ ცნობიერების ამაღლება მოხდა. მათ შეიტყვეს, თუ როგორ უნდა მოარგონ ბიზნესებმა დავის გადაჭრის საშუალებები საკუთარ საჭიროებებს, და როგორ შეუძლია არბიტრაჟს დაეხმაროს ბიზნესებს, რომ მათ საკუთარი კომერციული დავების სწრაფი და სანდო გზით გადაწყვეტა შეძლონ.