ბენჩბუქი არის შეუცვლელი საცნობარო, დამხმარე სახელმძღვანელო მოსამართლეებისათვის, რომელიც მათთვის მარტივად ხელმისაწვდომს ხდის სხვადასხვა სფეროში არსებულ სამართლებრივს რჩევებს. ეს რესურსი ეხმარება მოსამართლეებს მოქმედი კანონმდებლობისა და პრეცედენტული სამართლის შესაბამისად მიუდგნენ ყოველდღიურ საკითხებს, რაც საბოლოოდ ხელს უწყობს სასამართლო გადაწყვეტილებების მიღების პროცესის ეფექტურობისა და ეფექტიანობის გაუმჯობესებას.

დღეისათვის საქართველოს იურიდიულ სისტემას არ გააჩნია ამ ტიპის ბენჩბუქები,  ამდენად, USAID სამართლის უზენაესობის პროგრამის მხარდაჭერით სამი ბენჩბუქის შემუშავება განსაკუთრებული მნიშვნელობისაა, როგორც ზოგადად იურიდიული საზოგადოების, ისე კონკრეტულად ქართველი მოსამართლეებისთვის.

15-17 სექტემბერს, საერთო სასამართლოების მოსამართლეები, ამერიკელ ექსპერტ პატრიცია ნუნანთან ერთად, ბენჩბუქებზე სამუშაოდ, სამი მნიშვნელოვანი მიმართულებით: გამოხატვის თავისუფლება, ქალთა უფლებები და ბავშვთა უფლებები. მოსამართლეები, რომლებიც ჩართულნი არიან ამ პროცესში, ასევე არიან პროგრამის მხარდაჭერით შექმნილი სამართლის უზენაესობის პრაქტიკის ჯგუფების წევრები, რომლებიც ფოკუსირებულია ზემოაღნიშნულ სფეროებზე.

USAID სამართლის უზენაესობის პროგრამის ხელმძღვანელმა, გიორგი ჩხეიძემ ხაზგასმით აღნიშნა მოსამართლეების ყოველდღიური საქმიანობის შესრულებისას ბენჩბუქების დანერგვის მნიშვნელობა: „არ არსებობს უნივერსალური წესი, როდესაც საქმე ამ ტიპის სახელმძღვანელოს შექმნას ეხება. უმჯობესია მონაწილე მოსამართლეებმა ერთობლივად განსაზღვრონ ამ რესურსების ტიპი, მოცულობა, შინაარსი და სტილი, რათა შექმნილი პროდუქტი სწორად მიუსადაგონ ქართველი მოსამართლეების რეალურ საჭიროებებს.“

USAID სამართლის უზენაესობის პროგრამის მოწვეულმა ექსპერტმა, პატრიცია ნუნანმა მოსამართლეებს გააცნო ბენჩბუქის კონცეფცია, მისი მიზნები, ტიპები და სტანდარტული პროცესი შეერთებულ შტატებში ბენჩბუქების შედგენის, განახლებისა და გავრცელებისა. ის მონაწილეებს ასევე დაეხმარა მოსამართლეთა კონკრეტული საჭიროებების იდენტიფიცირებაში, სამართლის თითოეულ შესაბამის სფეროში.

მონაწილე მოსამართლეებმა აღნიშნეს, რომ მოქმედი პრეცედენტების მოძიებისას, მათ ხშირად უხდებათ კოლეგებთან, მათ შორის უმაღლესი ინსტანციის მოსამართლეებთან კომუნიკაცია, რათა მოიკვლიონ შესაბამისი საუკეთესო პრაქტიკა. ბენჩბუქებმა მნიშვნელოვნად უნდა შეცვალოს ეს პროცესი. მათ, მოკლე და მოსახერხებელი სახით, უნდა გააერთიანონ მოქმედი კანონმდებლობა და პრეცედენტული სამართალი შესაბამის თემებზე. გარდა ამისა, ბენჩბუქი გამოკვეთს იმ საკითხებსაც, რომლებზეც არ არსებობს მყარად დამკვიდრებული სასამართლო პრაქტიკა ან სტანდარტები და  მიუთითებს იმ სანდო სამართლებრივ რესურსებს, რომლებსაც მოსამართლეები შეიძლება დაეყრდნონ რთული საქმეების გადაწყვეტისას.

მონაწილე მოსამართლეები დაიყვნენ სამ სამუშაო ჯგუფად ბავშვების უფლებების, ქალთა უფლებებისა და გამოხატვის თავისუფლების მიმართულებით. აქტიური დისკუსიების მეშვეობით, მათ გამოკვეთეს ბენჩბუქებით დასაფარი საკითხები და განსაზღვრეს სავარაუდო სტრუქტურა. მათ ასევე შეიმუშავეს დეტალური სტრუქტურა ცალკეული თავებისთვის და გაანაწილეს მოვალეობები ჯგუფებს შიგნით.

თითოეული ბენჩბუქის სამუშაო ჯგუფი ხელახლა შეიკრიბა ექსპერტთან ერთად 19-დან 21 ოქტომბრის პერიოდში, რათა დაესრულებინათ შესაბამისი ბენჩბუქების მონახაზის პროექტი და შეეთანხმებინათ პროექტის განხორციელების გეგმა, სამუშაო პროცესის პროგრესისა და ვადების მონიტორინგის ჩათვლით. დასრულების შემდეგ, ბენჩბუქები გამოქვეყნდება ელექტრონულად, რაც არა მხოლოდ  ხელმისაწვდომს გახდის მათ, არამედ გაადვილებს ცვლილებების შეტანის ან სამომავლოდ, ახალი საკითხების ჩამატების პროცესსაც.