“მინდა, მადლობა გადავუხადო USAID სამართლის უზენაესობის პროგრამას და ამერიკელ ხალხს შესაძლებლობისათვის, მონაწილეობა მიმეღო ამ შესანიშნავ პროგრამაში. ნიდერლანდებში ვიზიტი ჩემთვის, როგორც მოქმედი მოსამართლის და პროფესორისთვის, სასარგებლო გამოცდილება იყო. ამ გამოცდილებას კი, რა თქმა უნდა, ისევ ჩვენს სტუდენტებს და საზოგადოებას მოვახმარ.“ - განაცხადა გორის რაიონულმა სასამართლომ მოსამართლე ლევან დარბაიძემ, რომელმაც ახლახან დაასრულა ნიდერლანდებში ვიზიტი (2-15 ივლისი).

ქალაქ ლეიდენში ყოფნის პერიოდში მოსამართლე დარბაიძემ გაიარა ყოვლისმომცველი სასწავლო კურსი ბავშვთა საერთაშორისო უფლებების მიმართულებით ლეიდენის უნივერსიტეტში. ის მადლიერია, რომ ჰქონდა შესაძლებლობა გაცნობოდა ბავშვთა უფლებების სფეროში არსებულ უახლეს გამოწვევებსა და ტენდენციებს ევროპაში.

კურსი მოიცავდა ისეთ საკითხებს როგორიცაა: ბავშვზე მორგებული მართლმსაჯულების საერთაშორისო პრინციპები; კანონთან კონფლიქტში მყოფი არასრულწლოვნის დაცვის და მართლმსაჯულების სისტემაზე ხელმისაწვდომობის საერთაშორისო სტანდარტები; ძალადობის მსხვერპლი ბავშვების დაცვის ეფექტური საშუალებები; მოსამართლის როლი კანონთან კონფლიქტში მყოფი ბავშვების საქმეთა განხილვისას; არასრულწლოვანთა მიმართ სასჯელის დანიშვნის ძირითადი პრინციპები; აღდგენითი მართლმსაჯულების სისტემის განვითარების საერთაშორისო ტენდენციები; განრიდება-მედიაციის როლი ბავშვთა რესოციალიზაცია-რეაბილიტაციის საქმეში; არასრულწლოვანთა მიგრაციის თანამედროვე გამოწვევები; ბავშის უფლებები ციფრულ სამყაროში; ბავშვის უფლებების კონსტიტუციური დაცვის გარანტიები; ბავშვის ომბუდსმენის ინსტიტუტის მნიშვნელობა დემოკრატიულ საზოგადოებაში და ა.შ.  

სასწავლო კურსის დასრულების შემდეგ, მოსამართლე დარბაიძეს ეწვია ლეიდენის და ჰააგის სასამართლოებს, დაესწრო სასამართლო პროცესებს, როგორც სისხლის, ისე სამოქალაქო და საოჯახო სამართლის მიმართულებით, ჰქონდა შეხვედრები მოსამართლეებთან და სასამართლოს თავმჯდომარეებთან. ამ პროცესში, ის უშუალოდ მოსამართლეებისგან გაეცნო იმ ძირითად პრინციპებს, რომლის საფუძველზე ამსტერდამის და როტერდამის სასამართლოებში შეიქმნა ბავშვზე მორგებული გარემო, თანამედროვე სასამართლო დარბაზები, მოსამართლეთა საერთო სამუშაო ოთახები, სრულად ელექტრონული სამართალწარმოება სასამართლოებში, დანაშაულის მსხვერპლი და მოწმე ბავშვების დაკითხვის თანამედროვე ევროპული სივრცეები, ბავშვის სარეაბილიტაციო დაწესებულებები და ა.შ.

„ასევე მქონდა საინტერესო შეხვედრები ლეიდენის ბავშვის უფლებათა სახლში, სადაც ამ სფეროში მომუშავე მკვლევარებთან ძალზედ საინტერესო დისკუსიები გაიმართა. ასევე შევხვდი არასრულწლოვანთა მართლმსაჯულებაში ჩართულ სხვა აქტორებსაც, კერძოდ, პროკურორებს, სოციალურ მუშაკებს და ფსიქოლოგებს, რომლებთანაც ვისაუბრეთ არასრულწლოვანთა მართლმსაჯულების თანამედროვე გამოწვევებსა და პერსპექტივებზე.“ - აღნიშნა მოსამართლე დარბაიძემ.