საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, ქ. გორში საინფორმაციო შეხვედრა გამართა. შეხვედრის დროს, თამარ იმნაიშვილმა, საქართველოს მედიატორთა ასოციაციის აღმასრულებელმა დირექტორმა და ირაკლი გელოვანმა, USAID სამართლის უზენაესობის პროგრამის ADR მრჩეველმა ადგილობრივი სამოქალაქო საზოგადოების ორგანიზაციების, კერძო სექტორის, აკადემიური წრეებისა და ადგილობრივი თვითმმართველობის ორგანოების წარმომადგენლებს მედიაციისა და მისი უპირატესობების შესახებ ინფორმაცია მიაწოდეს.

ოცდასამმა ადგილობრივმა აქტორმა და მედიაციის პოტენციურმა მომხმარებელმა მედიაციის სხვადასხვა ასპექტის შესახებ გამომსვლელების მოსაზრებები მოისმინა, რაც მოიცავდა ინფორმაციის მიწოდებას იმის თაობაზე, თუ რას წარმოადგენს მედიაცია, რა დადებითი მხარეები გააჩნია მას, რა ტიპის დავებისათვის გამოიყენება იგი, რა სახის ხარჯები უკავშირდება მედიაციის პროცესს, რა ფუნდამენტური პრინციპები და პროცედურები არსებობს, რა განსხვავებაა სასამართლო და კერძო მედიაციას შორის. შეხვედრის მონაწილეებმა ასევე მიიღეს ინფორმაცია იმის შესახებ, თუ როგორ ხდება პროცესში მედიატორის ჩართვა.

შეხვედრის ფასილიტატორებმა მონაწილეებს წარმატებული სამედიაციო საქმეებისა და საუკეთესო პრაქტიკის კონკრეტული მაგალითები გაუზიარეს. დამსწრე საზოგადოებამ დადებითად შეაფასა დავის მოგვარების ეს საშუალება და  განსაკუთრებული ინტერესი გამოავლინეს მედიატორის პროფესიის დაუფლებასთან დაკავშირებით. ისინი ასევე დაინტერესდნენ, თუ რა ხანგრძლივობისაა პროცედურები, რაც ამ პროცესს უკავშირდება. შემდეგი მსგავსი ტიპის შეხვედრა 2023 წლის 17 ნოემბერს ქ. ბათუმში იგეგმება.