2024 წლის 27 მაისს, დამოუკიდებელი იურისტების ჯგუფმა და დემოკრატიის ინდექსი - საქართველომ, USAID სამართლის უზენაესობის პროგრამის მხარდაჭერით, აღმოსავლეთ და ცენტრალური ევროპის ქვეყნებში კანონის უზენაესობის საფრთხეების შესახებ საერთაშორისო ონლაინ დისკუსია გამართეს. შეხვედრას 24 მონაწილე, მათ შორის დარგის პროფესიონალები, სასამართლოს ექსპერტები და არასამთავრობო ორგანიზაციების წარმომადგენლები ესწრებოდნენ.

მომხსენებლებმა, პიტერ ჩუროშმა ორგანიზაცია Via Iuris-სა და პოლონეთის მეცნიერებათა აკადემიიდან და ჯიმ მოლიტერნომ ვაშინგტონისა და ლი უნივერსიტეტიდან, დამსწრეებს მიაწოდეს ინფორმაცია სლოვაკეთში, პოლონეთსა და უნგრეთში პოპულიზმის შედეგებსა და მის გავლენაზე კანონის უზენაესობაზე. ისაუბრეს აღნიშნულ ქვეყნებში კანონის უზენაესობის სისტემატურ გამოწვევებზე და პარალელები გაავლეს საქართველოში არსებულ მსგავს ტენდენციებთან.

პიტერ ჩუროშმა პოლონეთში, უნგრეთსა და სლოვაკეთში ბოლო პერიოდის საკანონმდებლო ცვლილებები მიმოიხილა და სასამართლო სისტემაში სისტემური ჩარევების გავლენასა და სამოქალაქო საზოგადოების ორგანიზაციებზე დაწესებული შეზღუდვებზე ისაუბრა. ჯიმ მოლიტერნომ ისტორიული მაგალითების მოყვანისას ყურადღება გაამახვილა სლოვაკეთში სასამართლო ხელისუფლების დამოუკიდებლობის დაცვის მცდელობებზე. გარკვეული პოზიტიური რეფორმების მიუხედავად, მოლიტერნომ კანონის უზენაესობის უზრუნველყოფის მიმდინარე გამოწვევებს გაუსვა ხაზი.

მონაწილეებმა გაავლეს პარალელები სლოვაკეთსა და საქართველოს კანონმდებლობებს შორის. ისაუბრეს იმ კანონებზე რომლებმაც შეიძლება უცხოური დაფინანსების მიმღები ორგანიზაციების სტიგმატიზებას შეუწყოს ხელი და საფრთხე შეუქმნას დემოკრატიულ ინსტიტუტებს.

დისკუსია სასამართლო რეფორმატორთა საერთაშორისო ქსელის ფარგლებში იმართება და სხვადასხვა ქვეყნის გამოცდილების გაზიარებას ისახავს მიზნად. ქსელი აერთიანებს 59 წევრს აშშ-ს, ევროპის, აზიის, და ლათინური ამერიკის 23 სხვადასხვა ქვეყნიდან.