USAID სამართლის  უზენაესობის პროგრამა აქტიურად უჭერს მხარს თანამშრომლობას სხვადასხვა დაინტერესებულ მხარეებს შორის, ადგილობრივი მოსახლეობის წინაშე არსებული პრობლემების მოსაგვარებლად.

2023 წლის 28 სექტემბერს, USAID სამართლის უზენაესობის პროგრამის მხარდაჭერით, სამოქალაქო საზოგადოების ორგანიზაციამ პრევენცია პროგრესისთვის (PFP) უმასპინძლა შეხვედრას, სადაც ქვემო ქართლის რეგიონში, განსაკუთრებით ეთნიკური უმცირესობებით დასახლებულ მუნიციპალიტეტებში, მართლმსაჯულების ხელმისაწვდომობის საკითხები განიხილეს.

შეხვედრას ჩვიდმეტი მონაწილე დაესწრო, მათ შორის რუსთავის საქალაქო სასამართლოს მოსამართლე, პროკურორები, ადვოკატები, სახალხო დამცველის ქვემო ქართლის ოფისისა და სამოქალაქო საზოგადოების წარმომადგენლები. მონაწილეებმა განიხილეს სასამართლო სისტემის შესახებ საზოგადოების ინფორმირებულობის გაზრდის სტრატეგიების შემუშავებასთან დაკავშირებული თემები.

სასამართლოს გუშაგის (GCW) დირექტორმა, ნაზი ჯანეზაშვილმა მოქალაქეების მიერ სასამართლოს მონიტორინგის შედგეგები წარადგინა, რომელიც USAID სამართლის უზენაესობის პროგრამის მხარდაჭერით განხორციელდა. შეხვედრაზე განსაკუთრებული ყურადღება დაეთმო კონკრეტულად ქვემო ქართლში არსებულ გამოწვევებს, როგორიცაა პროფესიონალი თარჯიმნების ნაკლებობა, რაც, თავის მხრივ, აფერხებს მართლმსაჯულების თანაბარ ხელმისაწვდომობას.

PFP-ის ადგილობრივმა წარმომადგენელმა, ნაშირ ორდუხანოვმა შეხვედრის მნიშვნელობაზე ისაუბრა და აღნიშნა: “შეხვედრის მიზანია, ხელი შევუწყოთ ამ სფეროში მომუშავე პროფესიონალების დიალოგს, რათა განიხილონ თუ რა გამოწვევები და პრობლემებია მართლმსაჯულების სისტემაში”. 

დისკუსიების შედეგად მიღებული ინფორმაციის გასავრცელებლად, PFP-მა, ადგილობრივ არასამთავრობო ორგანიზაცია დემოკრატიული ჩართულობისა და აქტივიზმის ცენტრთან თანამშრომლობით, მოამზადა ანგარიში მართლმსაჯულების ხელმისაწვდომობასთან დაკავშირებული ბარიერების შესახებ. დოკუმენტში გააანალიზებულია ისეთი საკითხები, როგორიცაა არსებული კანონმდებლობა და პრაქტიკა თარჯიმნებთან დაკავშირებით, თარგმანის ხარისხი სასამართლო პროცესის დროს, სასამართლო სხდომების გაჭიანურება, არასაკმარისი იურიდიული დახმარება რეგიონში და ინფორმაციის ნაკლებობა იმის შესახებ, თუ როგორ და როდის შეუძლიათ მოქალაქეებს მიმართონ სასამართლოს.

შეხვედრა  PFP-ის პროექტის ფარგლებში გაიმართა, რომელიც USAID სამართლის უზენაესობის პროგრამის მხარდაჭერით ხორციელდება. პროექტი მიზნად ისახავს მარნეულისა და ბოლნისის მუნიციპალიტეტებში მცხოვრები ეთნიკური უმცირესობების წარმომადგენლების ინფორმირებას მართლმსაჯულების ხელმისაწვდომობისა და სამართლიანი სასამართლოს მნიშვნელობის შესახებ.