2024 წლის 14 თებერვალს, ივანე ჯავახიშვილის სახელობის თბილისის სახელმწიფო უნივერსიტეტში (თსუ) გაიმართა ოჯახური ძალადობის საქმეებზე სისხლის სამართლის სასამართლო პროცესების მონიტორინგის ანგარიშის პრეზენტაცია, რომელიც მომზადებულ იქნა მისი ერთ-ერთი კლინიკური პროგრამის ფარგლებში. USAID სამართლის უზენაესობის პროგრამამ მხარი დაუჭირა მონიტორინგის პროგრამას, როგორც მისი ერთ-ერთი უმთავრესი მიზნის - საქართველოში სამართლის უზენაესობის გაძლიერებისა და ადამიანებზე ორიენტირებული მართლმსაჯულების ხელშეწყობის - ნაწილს. პრეზენტაციას 40-მდე სტუდენტი, აკადემიკოსი და იურიდიული პროფესიის წარმომადგენელი ესწრებოდა.

ღონისძიება გახსნა თსუ-ს იურიდიული ფაკულტეტის დეკანმა თამარ ზარანდიამ და მადლობა გადაუხადა მკვლევართა ჯგუფს თსუ-ს კლინიკური სწავლების დირექტორის ანა ხარაიშვილის ხელმძღვანელობით ამ მრავალმხრივი პროექტის ეფექტიანი მართვისთვის, რომელშიც მონაწილეობდნენ მოსამართლეები, სტუდენტები და სასამართლოს მომხმარებლები.

გახსნის შემდეგ, წამყვანმა ექსპერტმა გოგა ხატიაშვილმა და კლინიკის სტუდენტებმა სოფიკო ბახბახაშვილმა და ალექსანდრე ყაველაშვილმა განმარტეს მონიტორინგის პროგრამის მეთოდოლოგია და მისი დასკვნები. მათი განმარტებით, მონიტორინგს ახორციელებდნენ USAID სამართლის უზენაესობის პროგრამის მხარდაჭერით დაფუძნებულ თსუ ქალთა მიმართ ძალადობის წინააღმდეგ ბრძოლის კლინიკაში მომუშავე სტუდენტები. კლინიკაში მომუშავე სტუდენტები პროექტის ემპირიული კვლევის ეტაპზე თბილისის საქალაქო სასამართლოში ოჯახური ძალადობის 62 საქმის განხილვის სხდომას დააკვირდნენ. მათ შენიშნეს, რომ ოჯახში ძალადობის შემთხვევების უმეტესობაში მსხვერპლი იყო ქალი, ბრალდებული, როგორც წესი, მამაკაცი, ხშირად მეუღლე ან მშობელი.

გირაო და პატიმრობა იყო ყველაზე გავრცელებული აღკვეთის ღონისძიებები, მაგრამ მათი ეფექტიანობა მომავალი დანაშაულების პრევენციაში გაურკვეველი იყო. გამოწვევები წარმოიშვა, როდესაც დაზარალებულებმა უარი თქვეს ახლო ნათესავების წინააღმდეგ ჩვენების მიცემაზე, რის შედეგადაც ბრალდებულები გაამართლეს არასაკმარისი მტკიცებულებების გამო. მიუხედავად იმისა, რომ პატიმრობა და პირობითი სასჯელი იყო ტიპიური სასჯელი, მათი პროპორციულობა დანაშაულთან ხანდახან ეჭვქვეშ იდგა. მსხვერპლები ასევე განიცდიდნენ მეორადი ვიქტიმიზაციის რისკს სასამართლო პროცესის დროს, რასაც ასევე ამწვავებს სასამართლო განხილვის გაჭიანურება.

დამსწრეთა შორის იყვნენ თბილისის საქალაქო სასამართლოდან მოსამართლეები ალექსანდრე იაშვილი და ელენე გოგუაძე. მოსამართლე იაშვილმა ხაზი გაუსვა კოლექტიური ძალისხმევის მნიშვნელობას ოჯახში ძალადობის წინააღმდეგ საბრძოლველად და იურისტთა მომავალი თაობის მოსამზადებლად მართლმსაჯულების დაცვისა და საზოგადოებრივი უსაფრთხოების უზრუნველსაყოფად.