ივანე ჯავახიშვილის სახელობის თბილისის სახელმწიფო უნივერსიტეტის (თსუ) იურიდიულ ფაკულტეტზე, USAID სამართლის უზენაესობის პროგრამის ხელშეწყობით, ქალთა მიმართ ძალადობის წინააღმდეგ ბრძოლის კლინიკა დაფუძნდა. 

მართლმსაჯულების შესახებ ინიციატივების მხარდასაჭერად, პროგრამა აგრძელებს უნივერსიტეტების ბაზაზე საზოგადოებაზე ორიენტირებული მართლმსაჯულების პროექტების განხორციელებას, რომელიც საშუალებას მისცემს სტუდენტებს დააკვირდნენ ადგილობრივი სასამართლოების მუშაობას. პირველი ეტაპი მოიცავს სილაბუსის შემუშავებას და სტუდენტების ტრენინგს ქალთა მიმართ ძალადობის საკითხებში. მეორე ეტაპი კი თბილისის საქალაქო სასამართლოში მსგავსი საქმეების მონიტორინგს და დაკვირვების შედეგად მიღებული მონაცემების აღრიცხვას გულისხმობს. დასკვნით ეტაპზე, პროექტის ჯგუფი გააანალიზებს საქმის მონიტორინგის შედეგებს და მოამზადებს ანგარიშს, რომელსაც წარუდგენს ფართო აუდიტორიას. 

პროექტი წარმოადგენს USAID სამართლის უზენაესობის პროგრამის ფართო ინიციატივის ნაწილს, რომლის მიზანია ხელი შეუწყოს სამოქალაქო საზოგადოების მრავალი სექტორის, მათ შორის უნივერსიტეტების ჩართულობას მართლმსაჯულების სისტემის მონიტორინგში. თსუ-ს კლინიკა მნიშვნელოვან წვლილს შეიტანს ამ პროცესში, რადგან ის მიზნად ისახავს სასამართლო გადაწყვეტილებების გამჭვირვალობის გაზრდას ქალთა მიმართ ძალადობის წინააღმდეგ ბრძოლის დროს.

2023 წლის 31 იანვარს, თსუ-ში პირველი სამუშაო შეხვედრა გამართა, რომელშიც ქალთა მიმართა ძალადობის საქმეთა განმხილველ საერთო სასამართლოების რვა მოსამართლე (თბილისისა და რუსთავის საქალაქო სასამართლოების, და თბილისის სააპელაციო სასამართლოს სისხლის და ადმინისტრაციული სამართლის შემადგენლობის მოსამართლეები) და კლინიკის ხელმძღვანელი, რვა მაგისტრანტი სტუდენტი, იურიდიული ფაკულტეტის დეკანი და USAID სამართლის უზენაესობის პროგრამის წარმომადგენლები მონაწილეობდნენ. შეხვედრის მიზანი მოსამართლეების მიერ მათი გამოცდილების კლინიკის სტუდენტებისთვის გაზიარება იყო. 

მონაწილეებმა იმსჯელეს პრაქტიკაში არსებულ სხვადასხვა გამოწვევებზე, მათ შორის, განიხილეს დაზარალებულის მიერ დუმილის უფლებით სარგებლობის საკითხი და არსებული პრობლემატიკა, დაზარალებულის დამოკიდებულება მოძალადის მიმართ,  ქალთა მიმართ ძალადობის საქმეებზე გამამტყუნებელი განაჩენისთვის საჭირო მტკიცებულებების სტანდარტი და სექსუალური შევიწროების საქმეთა განხილვის სპეციფიკა.

შეხვედრაზე წარმოდგენილმა ყველა მოსამართლემ მზაობა გამოთქვა კლინიკასთან და უნივერსიტეტის სტუდენტებთან თანამშრომლობაზე. მონაწილეები შეთანხმდნენ ურთიერთობის სხვადასხვა ფორმატსა და სამომავლო შეხვედრაზე.  სტუდენტების მიერ ქალთა მიმართ ძალადობის საქმეთა სასამართლო სხდომების მონიტორინგის განხორციელების ეტაპზე მომდევნო თვეებში კვლავ გაიმართება სამუშაო შეხვედრა, სადაც სტუდენტები მოსამართლეებს მონიტორინგის შუალედურ შედეგებს გაუზიარებენ და  მნიშვნელოვან საკითხებსა და მიგნებებზე მათგან უკუკავშირს მიიღებენ.