გაერომ 27 იანვარი აღიარა ჰოლოკოსტის მსხვერპლთა ხსოვნის საერთაშორისო დღედ, რადგან სწორედ 1945 წლის 27 იანვარს გაათავისუფლეს ტყვეები აუშვიცის საკონცენტრაციო ბანაკებიდან. 

მიმდინარე წლის 27 იანვარს, ილიას სახელმწიფო უნივერსიტეტის სამართლის სკოლის ადამიანის უფლებათა მიმართულებამ ჰოლოკოსტის მსხვერპლთა ხსოვნის დღის აღსანიშნავად გამართა ღონისძიება, რომელშიც რამდენიმე სტუდენტ-სპიკერმა მიიღო მონაწილეობა, მათ შორის თბილისის #21 საჯარო სკოლის მოსწავლეებმა მარიამ ოტიაშვილმა, ქეთი გაფრინდაშვილმა და ნინო გურულმა, და ილიას სამართლის სკოლის სტუდენტმა - სალომე კიკნაძემ. ღონისძიებას მხარი დაუჭირა USAID სამართლის უზენაესობის პროგრამამ.

ღონისძიების მოდერატორი ილიას სამართლის სკოლის პროექტის კოორდინატორი, მარიამ მელქაძე, იყო, რომელიც სტუდენტებს ჰოლოკოსტის გავლენის ღრმა მნიშვნელობაზე ესაუბრა.

დისკუსიების დროს მონაწილეები გაეცნენ ეთნიკური, რელიგიური და სხვა ფაქტორების საფუძველზე დისკრიმინაციის მნიშვნელობასა და მაგალითებს. მოდერატორმა ხაზი გაუსვა ანტისემიტიზმის დამანგრეველ შედეგებს. ჰოლოკოსტი კი ასეთი ანტისემიტიზმის ყველაზე საშინელი შედეგია. საჯარო სკოლების დამამთავრებელი საფეხურის და ილიას სამართლის სკოლის 25-მა მოსწავლემ და სტუდენტმა მოისმინა ნაწყვეტები ჰოლოკოსტს  გადარჩენილი პირების ინტერვიუებიდან, რომლებიც გაჯერებული იყო ტრაგედიის, იმედისა და გამძლეობის მწვავე ნარატივით.