USAID სამართლის უზენაესობის პროგრამა აქტიურად თანამშრომლობს იურიდიული დახმარების მიმწოდებელთა ქსელთან, რომელიც უზრუნველყოფს იურიდიული დახმარების ორგანიზაციებს შორის საქმეების რეფერირებას მათი მანდატისა და შესაძლებლობების ფარგლებში. ქსელის წევრები იურიდიული დახმარების სამსახური, სამოქალაქო საზოგადოების ორგანიზაციები და საუნივერსიტეტო იურიდიული კლინიკები არიან.

18-19 დეკემბერს, ქსელის მხარდაჭერის მიზნით, პროგრამამ გამართა ორი სამუშაო შეხვედრა მტკიცების ტვირთსა და ექსპერტთა დასკვნებზე და მოწყვლადი ადამიანების უფლებების დაცვაზე. სამუშაო შეხვედრებს უძღვებოდნენ საერთაშორისო სამართლებრივი ფონდის მენტორი ინგრიდ ჰესი და ფონდის პროგრამის დირექტორი საქართველოში ალან დალი. შეხვედრებს 20 მონაწილე ესწრებოდა იურიდიული დახმარების სამსახურის, სამოქალაქო საზოგადოების ორგანიზაციებისა და საუნივერსიტეტო კლინიკებიდან.

პირველი შეხვედრა მტკიცების ტვირთსა და ექსპერტთა დასკვნებზე, ფოკუსირებული იყო შემდეგ საკითხებზე: მოწმესა და ექსპერტს შორის განსხვავება, ექსპერტის კვალიფიკაცია, ექსპერტის დასკვნის, როგორც მტკიცებულების დასაშვებობა (რელევანტურობა, სანდოობა) და საქმეში ექსპერტის დასკვნების რეალური მაგალითების განხილვა.

მეორე შეხვედრა მოწყვლადი ადამიანების უფლებების დაცვის თემაზე იყო ორიენტირებული. შეხვედრაზე განიხილეს ისეთი საკითხები, როგორიცაა პირის გაცნობის მნიშვნელობა, ვის ინტერესებსაც წარმოადგენს ადვოკატი - კლიენტის სოციალური მდგომარეობის ცოდნა, არის თუ არა შეზღუდული შესაძლებლობის მქონე პირი, შეზღუდული შესაძლებლობის მქონე პირის შემთხვევაში ახდენს თუ არა ეს მის სისხლისსამართლებრივი პასუხისმგებლობის ხარისხზე გავლენას, თუ აქვს ბავშვობის მატრავმირებელი გამოცდილება, რომელიც იქნება რელევანტური საქმისთვის, და არის თუ არა კლიენტი ეთნიკური უმცირესობის წარმომადგენელი. მონაწილეებმა გაუზიარეს ერთმანეთს თავიანთი გამოცდილება და საქმეები, რომლებიც მსგავს სიტუაციებთან იყო დაკავშირებული.