USAID სამართლის უზენაესობის პროგრამის („პროგრამა“) მხარდაჭერით, იურიდიული დახმარების სამსახურის 23 ადვოკატმა გაიარა ტრენინგი ადამიანის უფლებათა დაცვის საერთაშორისო მექანიზმებში საქმეების წარდგენის თაობაზე. ადვოკატები თბილისიდან, ბათუმიდან, ფოთიდან, ახალციხიდან, მცხეთიდან, ზესტაფონიდან, გორიდან და ოზურგეთიდან იყვნენ წარმოდგენილები.

ადამიანის უფლებათა ექსპერტ ბესარიონ ბოხაშვილის ხელმძღვანელობით, ტრენინგის მანძილზე განხილულ იქნა საკვანძო საერთაშორისო ორგანოების სტრუქტურა, მათ შორის, ადამიანის უფლებათა ევროპული სასამართლოსი და გაეროს სახელშეკრულებო ორგანოების, როგორიცაა ბავშვის უფლებების კომიტეტი, ქალთა მიმართ დისკრიმინაციის აღმოფხვრის კომიტეტი, და შეზღუდული შესაძლებლობის მქონე პირთა უფლებების კომიტეტი.

ტრენინგის მსვლელობისას ადვოკატებმა მიიღეს ინფორმაცია საერთაშორისო მექანიზმების წინაშე საქმის წარდგენისა და სასამართლო განხილვის პროცესში გასათვალისწინებელი პროცედურების შესახებ. ტრენინგის თემატიკა ასევე მოიცავდა ადამიანის უფლებათა ევროპულ კონვენციაში გაწერილ დასაშვებობის კრიტერიუმებს, რომლებიც აუცილებელად უნდა გაითვალისწინონ აპლიკანტებმა.

ტრენინგის მეორე ნაწილში ადვოკატებმა მიიღეს ინფორმაცია გაეროს შესაბამის სახელშეკრულებო ორგანოებში საქმის წარდგენის თაობაზე და სათანადო დასაშვებობის კრიტერიუმებზე. მონაწილეებმა აგრეთვე გააანალიზეს ევროპული სასამართლოსა და გაეროს სახელშეკრულებო ორგანოების დასაშვებობის კრიტერიუმები. ტრენინგის დასასრულს, ადვოკატებმა მიიღეს პრაქტიკული რჩევები, თუ როგორ უნდა შეიტანონ განაცხადები აღნიშნულ ორგანოებში.

ტრენინგი მისასალმებელი სიტყვით გახსნა პროგრამის ხელმძღვანელმა გიორგი ჩხეიძემ და აღნიშნა იურიდიული დახმარების სამსახურის მნიშვნელოვანი როლი სოციალურად დაუცველი ჯგუფების მხარდაჭერაში. სამსახურის დირექტორის მოადგილე ნინო მელაძემ კი გახსნით სიტყვაში სამსახურის ადვოკატების უნარებისა და შესაძლებლობების გასაუმჯობესებლად მსგავსი ტრენინგების ჩატარების მნიშვნელობაზე ისაუბრა.