ამსტერდამის სამართლის სკოლამ 17-19 ივლისს იურიდიული ეთიკის საერთაშორისო კონფერენციას (ILEC) უმასპინძლა, რომელიც პირველად ჩატარდა ევროპაში. კონფერენცის მთავარი მიზანი იურიდიული პროფესიის წარმომადგენლებს შორის მართლმსაჯულების სისტემის დიგიტალიზაციის პროცესში არსებული მიღწევებისა და გამოწვევების შესახებ ინფორმაციის გაცვლა იყო პროფესიულ ეთიკასთან მიმართებით.

USAID სამართლის უზენაესობის პროგრამის მხარდაჭერით კონფერენციას ესწრებოდა საქართველოს ადვოკატთა ასოციაციის ეთიკის კომისიის მთავარი იურისტი, სულხან-საბა ორბელიანის სამართლის სკოლის ასისტენტი თამარ ხუბულური.

კონფერენცია ეძღვნება ისეთ თემებს, როგორიცაა დიგიტალიზაცია, ინოვაცია და მართლმსაჯულების ხელმისაწვდომობა; ემპირიული და ინტერდისციპლინარული მიდგომები იურიდიული ეთიკისა და იურიდიული პროფესიის მიმართ;  ფილოსოფია და იურიდიული ეთიკა. დისკუსიები გაიმართა თემებზე გლობალიზაცია და იურიდიული პროფესია; იურიდიული პროფესიის რეგულირება; ეთიკა და სამთავრობო იურისტები; ეთიკა და იურიდიული განათლება; ეთიკა და კანონის უზენაესობა.

„სახელმწიფოს ვალდებულებაა უზრუნველყოს მოქალაქეთა პერსონალური მონაცემების დაცვა, მაგრამ ადვოკატის პროფესიული საიდუმლოება კანონის უზენაესობის არსებითი საფუძველი და მნიშვნელოვანი პროფესიული სტანდარტია. ადვოკატის ვალდებულება არ გაავრცელოს ინფორმაცია კლიენტის თანხმობის გარეშე, იცავს კლიენტის ავტონომიურობას, რაც განსაკუთრებით მნიშვნელოვანი მაშინ ხდება, როდესაც სახელმწიფო ცდილობს მასში ჩარევას“ - აღნიშნა თამარ ხუბულურმა. მან აღნიშნა, რომ კონფერენციაზე წარმართულმა დისკუსიამ გამოავლინა, რომ პერსონალური მონაცემების დაცვაზე საზედამხედველო სამსახურებს უნდა ჰქონდეთ ადვოკატების მიერ პერსონალური მონაცემების დამუშავების შემოწმების წესები, რა დროსაც დაცული იქნება ადვოკატის პროფესიული საიდუმლოება.

ILEC 2024 მიზნად ისახავდა წვლილი შეეტანა მეცნიერულ, პროფესიულ და საჯარო დებატებში მართლმსაჯულების სექტორში ახალი ტექნოლოგიების გამოყენებისა და მოწესრიგების შესახებ, როგორც ევროპაში, ისე მის ფარგლებს გარეთ, სამართლებრივი ეთიკისა და კანონის უზენაესობის პერსპექტივიდან.

საქართველოს ადვოკატთა ასოციაციის ეთიკის კომისიის მთავარი იურისტის  თამარ ხუბულურის კონფერენციაში მონაწილეობს მხარდაჭერა არა მხოლოდ ხაზს უსვამს საქართველოს მიერ მიღწეულ წინსვლას არამედ ხელს უწყობს შემდგომ

თანამშრომლობას და სწავლას გლობალურ დონეზე.

საბოლოო ჯამში ეს ინვესტიცია ხაზს უსვამს USAID-ის ერთგულებას განავითაროს იურიდიულ პროფესიაში ეთიკის სტანდარტები.