2024 წლის 2-12 ივლისის პერიოდში საქართველოს ახალგაზრდა იურისტთა ასოციაციამ (საია) ქუთაისში, ბათუმში, თელავსა და გორში დარგის ექსპერტებსა და სამოქალაქო საზოგადოების წარმომადგენლებთან მართლმსაჯულების სისტემაში არსებული გამოწვევების შესახებ შეხვედრები გამართა. შეხვედრები საიას მონიტორინგის პროექტის ფარგლებში ჩატარდა, რომელიც USAID სამართლის უზენაესობის პროგრამის მხარდაჭერით ხორციელდებოდა.

საიას დემოკრატიული ინსტიტუტების მხარდაჭერისა და ადამიანის უფლებების პროგრამების წარმომადგენლებმა ისაუბრეს იუსტიციის უმაღლესი საბჭოს (HCOJ) და თბილისის, ქუთაისის და ბათუმის საქალაქო სასამართლოების მონიტორინგის შედეგად გამოვლენილ გამოწვევებზე. მომხსენებლება ყურადღება გაამახვილეს იუსტიციის უმაღლესი საბჭოს არამოსამართლე წევრების დაგვიანებიულ დანიშვნაზე, და საბჭოში სხვადასხვა მნიშვნელოვანი საკითხის განხილვასთან დაკავშირებულ გამოწვევებზე. საბჭოში გამჭვირვალობის საკითხი პრობლემურია.  არ ქვეყნდება შეხვედრის ოქმები; ასევე, საბჭო არ პასუხობს სამოქალაქო საზოგადოების მიერ მოთხოვნილ ინფორმაციას, რითაც ფერხდება საჯარო ინფორმაციაზე ხელმისაწვდომობა.

შეხვედრაზე განიხილეს სისხლის სამართალწარმოებასთან დაკავშირებული მთელი რიგი ხარვეზები, რაც არსებით გავლენას ახდენს თავისუფლებისა და უსაფრთხოების, სამართლიანი სასამართლოს და პირთა ეფექტიანი სამართლებრივი დაცვის უფლებებზე. საიას წარმომადგენლებმა ისაუბრეს სასამართლოს გამჭვირვალობასა და დროულ ვადაში საქმეთა განხილვის საკითხებზე. აღნიშნეს, რომ სასამართლოები ხშირად არ აქვეყნებენ ინფორმაციას პირველი წარდგენის სხდომების შესახებ; ზოგიერთ შემთხვევაში დაინტერესებული პირები ვერ ესწრებიან საჯარო სხდომებს, ვინაიდან პროცესი პატარა დარბაზში ტარდება.  საიას დამკვირვებლების თქმით, ხშირია საქმეთა გაჭიანურება, რაც არღვევს ბრალდებულის გონივრულ ვადაში გასამართლების უფლებას. შეხვედრის მონაწილეები ასევე, ევროკომისიის რეკომენდაციების შესრულების და სხვა შესაბამისი საკითხებით დაინტერესდნენ.

ღონისძიებას 70 ადგილობრივი არასამთავრობო ორგანიზაციის და მედიის წარმომადგენლები, დარგის ექსპერტები და სტუდენტები დაესწრნენ.