USAID სამართლის უზენაესობის პროგრამა  ხელს უწყობს ცნობიერების ამაღლების ინიციატივებს, რომელიც უზრუნველყოფს მართლმსაჯულების ინსტიტუტებთან მოქალაქეების ჩართულობას.

29 აგვისტოს, პრევენცია პროგრესისათვის (PFP) და სამოქალაქო ჩართულობისა და აქტივიზმის ცენტრის ორგანიზებით მარნეულის მოსახლეობა რუსთავის საქალაქო სასამართლოს მოსამართლე  მადონა მასისურაძეს შეხვდა. შეხვედრა სამართლის უზენაესობის პროგრამის მიერ მხარდაჭერილი პროექტის „სასამართლოს შესახებ ცნობიერების ამაღლება მარნეულისა და ბოლნისის მუნიციპალიტეტებში” გაიმართა. პროექტი მიზნად ისახავს მარნეულისა და ბოლნისის მუნიციპალიტეტებში მცხოვრები ეთნიკურ უმცირესობების წარმომადგენლების ინფორმირებას მართლმსაჯულების ხელმისაწვდომობისა და სამართლიანი სასამართლოს მნიშვნელობის შესახებ. 

მოსამართლე მაისურაძემ ისაუბრა სასამართლო განხილვის ეტაპებზე, განსჯადობასა და ეთნიკური უმცირესობებით დასახლებულ რეგიონებში სასამართლო სხდომებთან დაკავშირებულ სპეციფიკაზე. კერძოდ, მოსამართლემ ხაზი გაუსვა ენობრივი ბარიერების პრობლემას და პროფესიონალი თარჯიმნების ნაკლებობას. მოსამართლის თქმით, თარჯიმნების როლი ძალიან მნიშვნელოვანია, რადგან ისინი ეხმარებიან მხარეებს სრულყოფილად ესმოდეთ პროცესის მიმდინარეობა მათთვის გასაგებ ენაზე.

პროექტის ადგილობრივმა კოორდინატორმა, ნაშირ ორდუხანოვმა განაცხადა: “ჩვენს საზოგადოებაში სასამართლოს შესახებ საინფორმაციო შეხვედრები ძალიან მნიშვნელოვანია, რადგან არსებობს მსგავს საკითხებზე ინფორმაციის სერიოზული ნაკლებობა. ვფიქრობ, შეხვედრა ნაყოფიერი გამოვიდა, ახალგაზრდები ძალიან აქტიურობდნენ, მათ ბევრი კითხვა დასვეს სასამართლო პროცესებსა და ნაფიც მსაჯულთა ინსტიტუტზე”.  შეხვედრის ერთ-ერთმა მონაწილემ, რომელიც დევნილთა თემთან მუშაობს, აღნიშნა, რომ ხშირ შემთხვევაში მოქალაქეები ვერ იცავენ საკუთარ უფლებებს, რადგან არ აქვთ საკმარისი ინფორმაცია და ცოდნა სასამართლოს შესახებ.

შეხვედრას 30-მდე მოქალაქე დაესწრო, მონაწილეებს შესაძლებლობა ჰქონდათ სასამართლოსთან დაკავშირებულ კითხვებზე უშუალოდ მოსამართლისგან მიეღოთ პასუხები. მონაწილეები დაინტერესდნენ თუ როგორ მუშაობს ნაფიც მსაჯულთა ინსტიტუტი, როგორ შეიძლება სასამართლო პროცესზე თარჯიმნად ჩართვა და რატომ ჭიანურდება პროცესები. შეხვედრის ბოლოს მოსამართლემ მოუწოდა დამსწრე საზოგადოებას ყოველთვის იბრძოლონ საკუთარი და სხვების უფლებების დასაცავად.