2024 წლის 18-19 აპრილს, USAID სამართლის უზენაესობის პროგრამის მხარდაჭერით, საქართველოს მედიატორთა ასოციაციამ ორგანიზება გაუწია მედიატორთა ეთიკის საკითხებზე ტრენინგს, რომელშიც ათმა მედიატორმა მიიღო მონაწილეობა. ისინი წარმოადგენენ საქართველოს სხვადასხვა ქალაქებს, მათ შორის თბილისს, ქუთაისს, ბათუმსა და ახალციხეს.

ეთიკის ტრენინგი საქართველოს მედიატორთა ასოციაციის უწყვეტი პროფესიული განვითარების პროგრამის მნიშვნელოვანი კომპონენტია, რომელიც პროგრამის წინამორბედი პროექტის - კანონის უზენაესობის მხარდაჭერა საქართველოში (PROLoG) დახმარებით შეიქმნა. იგი ყველა მედიატორისთვის სავალდებულოა.

ტრენინგს უძღვებოდნენ ნათია ჩიტაშვილი, საქართველოს მედიატორთა ასოციაციის აღმასრულებელი საბჭოს წევრი და მედიატორი და, ირაკლი ყანდაშვილი, ასოციაციის თავმჯდომარე. ტრენინგი მოიცავდა მთელ რიგ საკითხებს, რაც მიზნად ისახავდა მონაწილეების საჭირო ცოდნითა და უნარებით აღჭურვას, რათა მათ სამართლიანი, მიუკერძოებელი და ეთიკური მედიაციის პროცესების ჩასატარება შეძლონ. ტრენინგზე დამსწრე მედიატორებმა მონაწილეობა მიიღეს დისკუსიაში, რომელიც მედიაციაში ეთიკის მნიშვნელოვან როლს ეხებოდა. მათ მიიღეს რჩევები იმის შესახებ, თუ როგორ უნდა გაუმკლავდნენ ეთიკურ გამოწვევებს.

ტრენინგები ასევე მოიცავდა ჯგუფურ სავარჯიშოებს, სადაც მონაწილეები ერთად განიხილავდნენ კონკრეტულ შემთხვევებს, რომლებიც ეთიკურ გამოწვევებს უკავშირდებოდა. ეს შემთხვევები მოიცავდა ისეთ სცენარებს, როგორიცაა: 

• იმის გაგება, თუ როგორ უნდა მოხდეს ინტერესთა კონფლიქტის გამოვლენა, მართვა და გამჟღავნება, რაც შეიძლება მედიაციის პროცესში წარმოიშვას;
• მედიაციაში კონფიდენციალურობის დაცვისა და პირადი ცხოვრების ხელშეუხებლობის მნიშვნელობის განხილვა, კონფიდენციალურობის შეზღუდვებისა და იმ გარემოებების ჩათვლით, რომელთა არსებობის შემთხვევაშიც შესაძლებელია მისი გაუქმება ან დარღვევა;
• ინფორმირებული თანხმობის ცნების განხილვა და იმის უზრუნველყოფა, რომ ყველა მხარემ სრულად გაიგოს მედიაციის პროცესი, მათი უფლებები და მონაწილეობის შედეგი იქამდე, ვიდრე პროცესი დაიწყება;
• იმის ხაზგასმა, რომ მედიატორს ეკისრება სამართლიანობისა და თანასწორობის უზრუნველყოფა პროცესზე;
• მედიატორების იმ ინსტრუმენტებით უზრუნველყოფა, რაც მათ ეთიკური გადაწყვეტილების მიღებაში დაეხმარებათ. ეს ასევე მოიცავს მედიაციის პროცესში ეთიკური დილემების იდენტიფიცირებასა და გადაჭრას.

აღნიშნული ტრენინგი პროგრამის მიერ საქართველოს მედიატორთა ასოციაციაზე გაცემული მიზნობრივი გრანტის ნაწილია. საგრანტო აქტივობები გამოცდილების გაზიარების ინიციატივებს, მედიატორების განგრძობად პროფესიულ განვითარებას და სასამართლო მედიაციის განვითარების მხარდაჭერას მოიცავს.