2024 წლის 28-29 მარტს, თოთხმეტ მედიატორს განგრძობადი პროფესიული განვითარების პროგრამის ფარგლებში პროფესიულ ეთიკაში ტრენინგი ჩაუტარდათ. ღონისძიების მხარდამჭერი USAID სამართლის უზენაესობის პროგრამა იყო.

ტრენინგს უძღვებოდნენ ირაკლი ყანდაშვილი, საქართველოს მედიატორთა ასოციაციის თავმჯდომარე და ნათია ჩიტაშვილი, მედიატორი და ასოციაციის საბჭოს წევრი. კურსი, რომელიც მედიატორთა ეთიკურ ვალდებულებებს მოიცავდა, სავალდებულოა ყველა პრაქტიკოსი მედიატორისთვის, მისი მიზანია მედიაციის ეთიკური პრინციპების დაცვის უზრუნველყოფა და მედიაციის სანდოობის განმტკიცება, ასევე პროფესიული ქცევის სტანდარტების დამკვიდრება.

ტრენინგის დროს განიხილეს ძირითადი ეთიკური პრინციპები, ასევე მოხდა ქართული სამედიაციო პრაქტიკის ანალიზი. დისკუსიების დროს ხაზი გაესვა ეთიკის მნიშვნელობას მედიაციის სფეროს განვითარების საქმეში, ასევე სტრატეგიებსა და რეკომენდაციებს მედიატორების მიერ ეთიკური დილემების გადაჭრის საქმეში.

მედიატორებმა მონაწილეობა მიიღეს სესიებში, რომლებიც ეხებოდა კონკრეტულ ეთიკურ გამოწვევებს. მაგალითად, როგორიცაა კონფიდენციალურობის დაცვა, მედიატორის კომპეტენციისა და ნებაყოფლობითი მონაწილეობის უზრუნველყოფა, სამართლიანობის, თანასწორობის, ანგარიშვალდებულების, თვითგამორკვევის პრინციპების დაცვა და კეთილსინდისიერების ხელშეწყობა მედიაციის პროცესში.